துபாய்: 79 மாடி கட்டிடத்தில் திடீர் தீ விபத்து
துபாய் நாட்டில் உள்ள மெரினா என்ற பகுதியில் 1,105 அடி உயரம் கொண்ட உலகில் மிகவும் உயரமான கட்டிடங்களில் ஒன்றான டார்ச் டவர் கட்டிடத்தில் இன்று அதிகாலை 1 மணிக்கு திடீரென தீவிபத்து ஏற்பட்டது., 79 மாடிகள் கொண்ட இந்த டவரின் 9-ஆவது மாடியில் பற்றிய தீ, தொடர்ந்து எரிந்து அடுத்தடுத்த மாடிகளுக்கு பரவி வருவதாக துபாய் ஊடகங்கள் செய்தி வெளியிட்டுள்ளன.
இந்த தீ விபத்து குறித்து தகவலறிந்து தீயணைப்பு படையினர் மற்றும் மீட்பு படையினர் சம்பவ இடம் நோக்கி விரைந்து சென்றனர். முதல்கட்டமாக அந்த கட்டிடத்தில் குடியிருப்பவர்கள் மற்றும் வணிக வளாகங்களில் தங்கியிருப்பவர்களை உடனடியாக வெளியேற்றிய தீயணைப்பு வீரர்கள் அடுத்தகட்டமாக தீயை கட்டுப்படுத்தும் பணியில் ஈடுபட்டனர்.
மேலும் இந்த தீவிபத்து குறித்து உள்ளூர் மக்கள் வீடியோ எடுத்து அதை ஃபேஸ்புக், டுவிட்டர் போன்ற சமூக வலைத்தளங்களில் பதிவிட்டு, வைரலாக்கி வருகின்றனர். தீ விபத்தால் அந்த பகுதியில் மின்சாரம் தடை செய்யப்பட்டுள்ளதாக அதிகாரிகள் தெரிவித்துள்ளனர்.
79 மாடிகள் கொண்ட டார்ச் டவர் கடந்த 2011-ஆம் ஆண்டில் திறக்கப்பட்டது. ஏற்கனவே, பிப்ரவரி 2015-ஆம் ஆண்டில் தீ விபத்து ஏற்பட்டது குறிப்பிடத்தக்கது.
