சிவா மனசுல சக்தி, பாஸ் என்கிற பாஸ்கரன், ஒரு கல் ஒரு கண்ணாடி போன்றபடங்களை இயக்கிய பிரபல இயக்குனர் எம்.ராஜேஷ் இயக்கி வரும் ‘வாசுவும் சிவாவும் ஒண்ணா படிச்சவங்க’ திரைப்படத்தின் படப்பிடிப்பு இறுதிக் கட்டத்தை நெருங்கியுள்ளது. ஆர்யா, தமன்னா முதல்முறையாக ஜோடி சேரும் இந்த படத்தின் பாடல் காட்சிகளின் படப்பிடிப்பு மட்டுமே மீதமுள்ள நிலையில் நேற்று புதிய பாடல் ஒன்று ஒலிப்பதிவு செய்யப்பட்டது.
சல்மான்கான் உள்பட பல பாலிவுட் பிரபலங்களுக்கு பாடிய பிரபல பாடகர் அர்மான் மாலிக் இந்த படத்திற்காக ஒரு சூப்பரான பாடலை பாடியுள்ளார். டி.இமான் மெட்டமைத்த இந்த பாடலை நா.முத்துகுமார் எழுதியுள்ளார்.
அர்மான் மாலிக் சல்மான்கான் நடித்த ஜெய் ஹோ படத்தில் பாடிய பாடல் உலக அளவில் பிரபலம் அடைந்தது குறிப்பிடத்தக்கது. இந்நிலையில் இத்தகைய பெருமை உள்ள பாடகரை தமிழில் அறிமுகப்படுத்துவதில் பெருமை கொள்வதாக டி.இமான் தனது டுவிட்டரில் தெரிவித்துள்ளார்.
ஆர்யா, தமன்னா, சந்தானம், பானு, கருணாகரன் உள்பட பலர் இந்த படத்தில் நடித்துள்ளனர். இந்த திரைப்படம் வரும் ஆகஸ்ட் மாதம் வெளிவரும் என்பது குறிப்பிடத்தக்கது. இந்த படத்தை ஆர்யா தனது சொந்த நிறுவனத்தின் மூலம் தயாரித்து வருகிறார்.
