2வது டி-20 போட்டியிலும் இந்தியா தோல்வி. சொந்த மண்ணில் தொடரை இழந்தது.
தென்னாப்பிரிக்க கிரிக்கெட் அணி இந்திய சுற்றுப்பயணம் செய்து முதல் கட்டமாக 3 டி-20 போட்டிகளில் விளையாடி வருகிறது. இந்த தொடரின் முதல் போட்டியில் தென்னாப்பிரிக்க அணி 7 விக்கெட்டுக்கள் வித்தியாசத்தில் அபாரமாக வெற்றி பெற்ற நிலையில் இன்று கட்டாக்கில் 2வது டி-20 போட்டி நடைபெற்றது.
டாஸ் வென்ற தென்னாபிரிக்க அணி கேப்டன் முதலில் பந்துவீச்சை தேர்வு செய்ததால் இந்திய அணி பேட்டிங் செய்தது. இன்றைய போட்டியில் இந்திய அணி வீரர்கள் மிகவும் மோசமாக பேட்டிங் செய்து 17.2 ஓவர்களில் 92 ரன்களுக்கு அனைத்து விக்கெட்டுக்களையும் இழந்தனர். நான்கு வீரர்கள் ரன் ஏதும் எடுக்காமலும், மூன்று வீரர்கள் ஒற்றை இலக்கத்திலும் ஆட்டமிழந்தனர் என்பது குறிப்பிடத்தக்கது.
93 ரன்கள் எடுத்தால் வெற்றி பெறலாம் என்ற மிக எளிய இலக்குடன் களமிறங்கிய தென்னாப்பிரிக்க அணி 4 விக்கெட்டுக்களை மட்டுமே இழந்து 17.1 ஓவர்களில் 96 ரன்கள் எடுத்து எளிதான வெற்றியை பெற்றது,. தென்னாப்பிரிக்காவின் மோர்கல் ஆட்டநாயகனாக தேர்வு செய்யப்பட்டார்.
இந்த வெற்றியின் மூலம் தென்னாப்பிரிக்க அணி 2-0 என்ற கணக்கில் தொடரை வென்றது. 3வது டி-20 போட்டி கொல்கத்தாவில் வரும் 8ஆம் தேதி நடைபெறவுள்ளது.
