சிந்து நதி நீர்மின் திட்டத்திற்கு உலக வங்கி அனுமதி: இந்தியாவுக்கு கிடைத்த வெற்றி
சிந்து நதியில் நீர்மின் திட்டத்தை உருவாக்குவதற்கு உலக வங்கி இந்தியாவிற்கு அனுமதி அளித்துள்ளது. இது இந்தியாவுக்கு கிடைத்த வெற்றியாக கருதப்படுகிறது.
கடந்த 1960ஆம் ஆண்டு சிந்து நதிநீர் பங்கீட்டு ஒப்பந்தம் இயற்றப்பட்டது. இந்தியா – பாகிஸ்தான் இடையேயான 9 ஆண்டுகள் இழுபறிக்கு பின்னர், உலக வங்கி உதவியுடன் ஒப்பந்தம் உருவானது. அதன்படி, ஜீலம் மற்றும் செனாப் ஆற்று நீரைப் பயன்படுத்த இரு நாடுகளுக்கும் கட்டுப்பாடுகள் விதிக்கப்பட்டன.
இந்த சூழலில் ஜீலம் மற்றும் செனாப் ஆற்றுப் பகுதியில் கிஷன்கங்கா(330 மெகாவாட்) மற்றும் ரேடில்(850 மெகாவாட்) ஆகிய நீர்மின் திட்டங்களை கட்டமைக்க இந்தியா திட்டமிட்டது. ஆனால் அதற்கு பாகிஸ்தான் கடும் எதிர்ப்பு தெரிவித்தது. இந்த விவகாரத்திற்கு உரிய தீர்வு காணப்படாமல், 57 ஆண்டுகள் இழுபறியில் நீடித்து வந்தது. இருநாடுகளும் உலக வங்கியுடன் மாறி, மாறி தங்கள் தரப்பு வாதங்களை எடுத்துரைத்தன.
இதற்கிடையில் இந்தியாவின் நீர்மின் திட்டத்திற்கு உலக வங்கி அனுமதி அளித்துள்ளது. இதுதொடர்பாக வரும் செப்டம்பரில் வாஷிங்டன் நகரில் சிந்து நதிநீர் ஒப்பந்த ஆலோசனைக் கூட்டம் நடைபெற உள்ளது. அதில் இந்தியா – பாகிஸ்தான் நாடுகள் நீர்மின் திட்டம் குறித்து விவாதிக்க உள்ளனர்.
