இலங்கைக்கு எதிரான 2வது டெஸ்ட் போட்டியில் இந்தியா அபார வெற்றி
இந்தியா மற்றும் இலங்கை அணிகளுக்கு இடையே நடைபெற்ற முதல் கிரிக்கெட் டெஸ்ட் போட்டியில் இந்திய அணி அதிர்ச்சி பெற்ற நிலையில் தற்போது நடைபெற்ற இரண்டாவது கிரிக்கெட் டெஸ்ட் போட்டியில் இந்திய அணி அபார வெற்றி பெற்றது.
கடந்த 20ஆம் தேதி கொழும்பு நகரில் ஆரம்பமான இந்த போட்டியில் டாஸ் வென்ற இந்திய அணி கேப்டன் கோஹ்லி முதலில் பேட்டிங்கை தேர்வு செய்தார். முதல் இன்னிங்ஸில் 393 ரன்கள் எடுத்த நிலையில் இந்திய அணி அனைத்து விக்கெட்டுக்களையும் இழந்தது. இதற்கு பதிலடி கொடுக்கும் வகையில் இலங்கை அணி 306 ரன்கள் எடுத்தது.
அடுத்து இரண்டாவது இன்னிங்ஸை தொடங்கிய இந்திய அணி, 325 ரன்கள் எடுத்து இலங்கைக்கு 413 ரன்கள் என்ற இலக்கை கொடுத்தது. தொடர்ந்து இரண்டாவது இன்னிங்ஸை விளையாடிய இலங்கை அணி இந்திய பந்துவீச்சாளர்களின் அதிரடி பந்துவீச்சுக்கு தாக்கு பிடிக்க முடியாமல் 134 ரன்களுக்கு அனைத்து விக்கெட்டுக்களையும் பறிகொடுத்து பரிதாபமாக தோல்வி அடைந்தது.
இந்த வெற்றியின் மூலம் இரு அணிகளும் தலா ஒரு வெற்றியை பெற்றுள்ளது. இன்னும் ஒரு போட்டி மட்டுமே மீதமிருக்கும் நிலையில் இந்த தொடரின் முடிவை அந்த போட்டி தீர்மானிக்கும் என்பதால் மூன்றாவது டெஸ்ட் போட்டி விறுவிறுப்பாக இருக்கும் என எதிர்பார்க்கப்படுகிறது.
