168 ரன்கள் வித்தியாசத்தில் அபார வெற்றி: உலகக்கோப்பை வாய்ப்பை இழந்தது இலங்கை
இந்திய கிரிக்கெட் அணி இலங்கையில் சுற்றுப்பயணம் செய்து விளையாடி வரும் நிலையில் ஏற்கனவே டெஸ்ட் மற்றும் ஒருநாள் போட்டி தொடரை வென்றுவிட்ட நிலையில் நேற்று நடைபெற்ற 4வது ஒருநாள் போட்டியிலும் 168 ரன்கள் வித்தியாசத்தில் வெற்றிபெற்றது. இலங்கை அணியின் இந்த படுதோல்வியால் 2019ஆம் ஆண்டு நடைபெறவுள்ள உலகக்கோப்பை போட்டியின் தகுதி போட்டியில் விளையாட வேண்டிய நிலை இலங்கைக்கு ஏற்பட்டுள்ளது
நேற்றைய போட்டியில் முதலில் பேட்டிங் செய்த இந்திய அணி 50 ஓவர்களில் 375 ரன்கள் குவித்தது. கேப்டன் விராட் கோலி மற்றும் ரோகித் சர்மா ஆகியோர் சதம் அடித்தனர். மணீஷ் பாண்டே 50 ரன்களும், டோனி 49 ரன்களும் எடுத்தனர்.
376 ரன்கள் எடுத்தால் மட்டுமே வெற்றி என்ற இமாலய இலக்கை நோக்கி விளையாடிய இலங்கை அணி 207 ரன்களுக்கு ஆட்டமிழந்தது. பும்ரா, பாண்டியா, குல்தீப் யாதவ் ஆகியோர் தலா இரண்டு விக்கெட்கள் வீழ்த்தினர்.
இரு அணிகளுக்கிடையேயான கடைசி ஒருநாள் கிரிக்கெட் போட்டி, செப்டம்பர் 3-ம் தேதி நடைபெற உள்ளது.
