அஜித், அனுஷ்கா, த்ரிஷா, அருண்விஜய் நடிப்பில் பிரமாண்டமாக உருவாகியுள்ள கவுதம் மேனனின் ‘என்னை அறிந்தால்’ திரைப்படத்தின் ரிலீஸ் தேதி ஜனவரி 9 என்பதில் அஜீத் மற்றும் ஏ.எம்.ரத்னம் உறுதியாக உள்ளனர். ‘ஐ’ படத்தை காரணம் காட்டி தியேட்டர் தர மறுப்பவர்களுக்கு இனிமேல் வெளிவரும் அஜீத்தின் படம் கிடைக்காது என்ற ரீதியில் ஒரு வதந்தி இன்று காலை முதல் சென்னை முழுவதும் பரவி வருகிறது. இதனால் தியேட்டர் உரிமையாளர்கள் மத்தியில் பெரும் பரபரப்பு ஏற்பட்டுள்ளதாக கூறப்படுகிறது. ஆனால் இது முழுக்க முழுக்க வதந்திதான் என்றும் அப்படி எந்தவொரு மிரட்டலும் அஜீத் தரப்பில் இருந்து வரவில்லை என்றும் படக்குழுவினர் டுவிட்டரில் தெரிவித்துள்ளனர்.
ஜனவரி 9ஆம் தேதி ரிலீஸாகும் ‘என்னை அறிந்தால்’ திரைப்படம் நன்றாக இருந்து சூப்பர் ஹிட் ஆகிவிட்டால், ஜனவரி 15ஆம் தேதிக்கு ‘ஐ’ படம் ரிலீஸாவதில் சிக்கல் ஏற்படும் என்றும் கூறப்படுகிறது. எனவே இதுகுறித்து இரண்டு படத்தயாரிப்பாளர்களும் கலந்து பேசி ‘என்னை அறிந்தால்’ படத்தை ஆங்கில புத்தாண்டுக்கு ரிலீஸ் செய்ய ஏற்பாடுகள் நடைபெற்று வருவதாகவும் ஒரு செய்தி பரவி வருகிறது.
இந்நிலையில் என்னை அறிந்தால் படத்தின் டீஸர் நாளை வெளியாகும் என கவுதம் மேனன் அதிகாரபூர்வமாக நேற்று அறிவித்தார். அவர் நேற்று இந்த அறிவிப்பை அறிவித்த 18 நிமிடங்களில் டுவிட்டரில் சென்னை அளவில் முதலிடத்தை பெற்றுள்ளது என்பது குறிப்பிடத்தக்கது.
