வெள்ளை மாளிகையை தகர்ப்போம். ஐ.எஸ்.ஐ.எஸ் தீவிரவாதிகள் வெளியிட்ட திடுக்கிடும் வீடியோ
சமீபத்தில் ஐ.எஸ்.ஐ.எஸ் இயக்கத்தினர் பாரீஸ் நகரில் நடத்திய தாக்குதலால் 100க்கும் அதிகமானோர் பலியானதை அடுத்து அமெரிக்கா, பிரான்ஸ் உள்பட பல நாடுகள் ஒன்றிணைந்து ஐ.எஸ்.ஐ.எஸ் இயக்கத்தை முழுவதுமாக அழிக்க அதிரடி நடவடிக்கை எடுத்து வருகின்றனர். ரஷ்ய விமானத்தையும் ஐ.எஸ்.ஐ.எஸ் தீவிரவாதிகள் தாக்கியுள்ளதால் ரஷ்யாவும் தீவிரவாதிகளுக்கு எதிராக தாக்குதல் நடத்தி வருகிறது.
இந்நிலையில் தங்களை அழிக்க நினைக்கும் அமெரிக்காவுக்கு பாடம் புகட்டும் வகையில் அமெரிக்காவின் வெள்ளை மாளிகையை தகர்க்கப் போவதாக ஐ.எஸ். தீவிரவாதிகள் மிரட்டல் விடுத்துள்ளனர். இதுகுறித்த வீடியோ ஒன்றை தீவிரவாதிகள் தங்கள் இணையதளத்தில் வெளியிட்டுள்ளனர். மேலும், பிரான்ஸ் நாட்டிலும் இன்னும் அதிகமான தாக்குதலை நடத்துவோம் என்றும் அவர்கள் அதில் சபதமிட்டு உள்ளனர்.
ஈராக்கில் இருந்து ஐ.எஸ். தீவிரவாதிகள் அந்த வீடியோவை வெளியிட்டு உள்ளதாக நிபுணர்கள் தெரிவித்துள்ளனர். 6 நிமிடங்கள் ஓடக்கூடிய இந்த வீடியோ, பாரீஸ்க்கு முன் ரோம் என தலைப்பிடப்பட்டுள்ளது. மேலும் அந்த வீடியோவில், தற்கொலைப்படை மற்றும் கார் வெடி குண்டுகள் மூலம் பிரான்ஸின் நினைவுச் சின்னங்கள் மற்றும் அமெரிக்க வெள்ளை மாளிகை ஆகியவற்றை தகர்க்கப் போவதாக மிரட்டல் விடுக்கப்பட்டுள்ளது. வெள்ளை மாளிகை தாக்குதல் என்பது ஒரு தொடக்கமாகவே இருக்கும் என்றும் அதில் கூறி அதிர்ச்சியை ஏற்படுத்தி உள்ளனர்.
