ஸ்ரீரங்கம் இடைத்தேர்தல் வரும் பிப்ரவரி 13ஆம் தேதி நடைபெற இருக்கும் நிலையில் முக்கிய அரசியல் கட்சிகளின் தலைவர்கள் விறுவிறுப்பாக தேர்தல் பிரச்சாரம் செய்து வருகின்றனர். இந்நிலையில் அதிமுக பொதுச்செயலாளர் தேர்தல் பிரச்சாரம் செய்வாரா? என்பது குறித்த அதிமுக தொண்டர்களின் விடை தெரியாத கேள்விக்கு தற்போது விடை கிடைத்துள்ளது.
தற்போது வெளிவந்துள்ள தகவலின்படி ஜெயலலிதா போயஸ் தோட்டத்தில் இருந்தே பேசும் பிரச்சார வீடியோவை நேரடியாக ஸ்ரீரங்கத்தில் உள்ள ஏழு இடங்களில் பிரமாண்டமான திரை அமைத்து ஒளிப்ரப்ப திட்டமிட்டுள்ளதாக தெரிகிறது.
ஆனால் நேரடி ஒளிபரப்பில் ஏதாவது பிரச்சனை ஏற்பட்டால் அது மக்கள் மனதில் அதிருப்தியை ஏற்படுத்திவிடும் என ஒருசிலர் கருத்து கூறியதால், ஜெயலலிதாவின் பிரச்சாரத்தை பதிவு செய்து பின்னர் ஸ்ரீரங்கத்தின் முக்கிய இடங்களில் ஒளிபரப்பவும் திட்டமிடப்பட்டுள்ளது.
இதுகுறித்து இறுதி முடிவு இன்னும் சில நாட்களில் அதிமுக தலைமைக்கழகம் அறிவிக்கும் என்றும் பிப்ரவரி முதல் வாரத்தில் ஜெயலலிதாவின் பிரச்சார வீடியோ ஸ்ரீரங்கத்தில் ஒளிபரப்பப்படும் என்றும் அதிமுக வட்டாரங்கள் கூறுகின்றன
