இலங்கை வடமாகாண முதல்வருக்கு தமிழக முதல்வர் எழுதிய நன்றி கடிதம்
இலங்கை நாடாளுமன்ற எதிர்க்கட்சி தலைவர் இரா.சம்பந்தன் நேற்று திமுக தலைவர் கருணாநிதி 13வது முறையாக எம்.எல்.ஏவாக தேர்வு செய்யப்பட்டதற்கு வாழ்த்து தெரிவித்ததையும், அவருக்கு கருணாநிதி நன்றி தெரிவித்து கடிதம் எழுதியதையும் பார்த்தோம். இந்நிலையில் இன்று மீண்டும் தமிழக முதலமைச்சராக பொறுப்பேற்ற ஜெயலலிதாவுக்கு இலங்கை வடமாகாண முதலமைச்சர் விக்னேஸ்வரன் வாழ்த்து தெரிவித்துள்ளார். அவருடைய வாழ்த்து ஜெயலலிதா நன்றி தெரிவித்து கடிதம் ஒன்றை அனுப்பியுள்ளார். அந்த கடிதத்தில் கூறியதாவது:
“அண்மையில் நடந்து முடிந்த தமிழ்நாடு சட்டப் பேரவை தேர்தலில் நான் பெற்ற வெற்றி குறித்த உங்களது பாராட்டுக் கடிதத்திற்கு எனது மனமார்ந்த நன்றியைத் தெரிவித்துக் கொள்கிறேன்.
தமிழக மக்களின் தொப்புள் கொடி உறவுகளான இலங்கைத் தமிழர்கள் நலன் காக்க, அவர்கள் உரிய நீதியைப் பெற என்னால் இயன்ற நடவடிக்கைகளைக் கடந்த ஐந்து ஆண்டுகளில் தமிழ்நாட்டின் முதலமைச்சர் என்ற முறையில் நான் எடுத்துள்ளேன். இலங்கை வடகிழக்கு மாகாணத் தமிழர்கள் உரிய நீதியைப் பெறும் வகையில் இந்திய அரசின் மூலம் தொடர்ந்து நடவடிக்கைகள் எடுப்பேன் என்பதை உங்களுக்குத் தெரிவித்துக் கொள்கிறேன்.
தமிழகம் மற்றும் இலங்கை வடகிழக்கு மாகாணத் தமிழர்கள் உறவு மேலும் வலுவடையும் வகையில் என்னை சந்திக்க நீங்கள் விழைவதுக் குறித்து மிக்க மகிழ்ச்சி. இருவருக்கும் வசதிப்படும் ஒரு நாளில் நாம் நிச்சயம் சந்திக்கலாம் என்பதைத் தெரிவித்துக் கொள்கிறேன். உங்களது நல்வாழ்த்துகளுக்கு மீண்டும் எனது நன்றியைத் தெரிவித்துக் கொள்கிறேன்” இவ்வாறு ஜெயலலிதா தனது கடிதத்தில் தெரிவித்துள்ளார்.
