ஜெயலலிதா சொத்துக்குவிப்பு வழக்கின் மேல்முறையீட்டு மனுவின் நேற்றைய விசாரணையின்போது கர்நாடக ஐகோர்ட் நீதிபதி கேட்ட கேள்விகளுக்கு பதில் சொல்ல முடியாமல் அரசு வழக்கறிஞர் பவானி சிங் திணறியதால் நீதிமன்றத்தில் பெரும் பரபரப்பு ஏற்பட்டது.
நேற்று நடந்த விசாரணையின்போது ஜெயலலிதா தரப்பு நீதிபதி பி.குமார் வாதம் செய்தபோது, “1991-96 காலகட்டத்தில் ஜெயலலிதா வாங்கிய சொத்துகள், கட்டிடங்கள் புதுப்பித்தது, வாகனங்கள் வாங்கியது, பொருட்கள் வாங்கியது உள்ளிட்ட அனைத்துக்கும் காசோலையே பயன்படுத்தினார்.
1991-ம் ஆண்டு ஜெயலலிதா பிறந்த நாளுக்காக அர்ச்சனா, கிருஷ்ணா, அடையார் ஆனந்தபவன் ஆகிய கடைகளில் ரூ.8 லட்சத்துக்கு இனிப்புகள் வாங்கி, அநாதை இல்லங்களுக்கு வழங்கினார். அதற்கு அவர் அளித்த காசோலையை தமிழக லஞ்ச ஒழிப்புத்துறை போலீஸார் கணக்கில் சேர்த்து கொள்ளவில்லை.
7.9.1995-ல் நடந்த சுதாகரனின் திருமண செலவுகள் அனைத்தையும், நடிகர் சிவாஜி கணேசனின் குடும்பத்தினர் செய்தனர். ஆனால், 1997-ம் ஆண்டுதான் லஞ்ச ஒழிப்புத்துறை போலீஸார் திருமணத்திற்காக செய்யப்பட்ட செலவுகள் குறித்து மதிப்பிட்டனர்’ என்று குமார் வாதிட்டார்.
இதையடுத்து நீதிபதி குமாரசாமி அரசு வழக்கறிஞர் பவானிசிங்கிடம், ‘‘ஜெயலலிதா தரப்பில் கூறப்படும் புகார்களுக்கு உங்களுடைய தரப்பு விளக்கம் என்ன? 1991-ம் ஆண்டுக்கு முன்னால் ஜெயலலிதா சினிமாவில் நடித்ததால் பெற்ற வருமானத்தை வழக்கில் சேர்த்துக் கொண்டீர்களா? அவர் முதல்வராக இருந்த போது மாதம் 1 ரூபாய் வீதம் 5 ஆண்டுகளில் ரூ.60 ஊதியமாக பெற்றுள்ளார். அப்படியென்றால் ஜெயலலிதா குவித்த சொத்துக்கும், அவருடைய ஊதியத்துக்கும் உள்ள விகிதாச்சாரம் என்ன?” என சரமாரியாக கேள்வி எழுப்பினார்.
நீதிபதியின் இந்த கேள்விகளுக்கு பதில் சொல்ல முடியாமல் அரசு வழக்கறிஞர் பவானிசிங் திணறியதால். கோபமடைந்த நீதிபதி குமாரசாமி, ‘‘அரசு வழக்கறிஞரான நீங்கள், முதலில் சொத்துக்குவிப்பு வழக்கில் பெங்களூரு சிறப்பு நீதிமன்றம் அளித்த தீர்ப்பை வாசிக்க வேண்டும்” என கடும் அதிருப்தியுடன் தெரிவித்தார்.
அதன்பின்னர் தனது வாதத்தை தொடர்ந்த பி.குமார், ‘1997-ம் ஆண்டு சென்னை முதன்மை அமர்வு நீதிமன்றத்தில் ஜெயலலிதா மீதான குற்றச்சாட்டுகள் பதிவு செய்யப்பட்டது. அவரின் விளக்கத்தை ஆங்கிலத்தில் மொழிப்பெயர்த்ததில் நிறைய தவறுகள் உள்ளன. அதனை மீண்டும் மறுமொழிப்பெயர்ப்பு செய்ய உத்தரவிட வேண்டும்”என்று கேட்டுக்கொண்டார்
இதைத்தொடர்ந்து “ஜெயலலிதா அளித்த விளக்கத்தை கர்நாடக மொழிபெயர்ப்புத்துறை இயக்குநர் சரியாக மொழிபெயர்க்க வேண்டும்” மறுமொழிபெயர்ப்பு செய்யப்பட்ட ஆவணங்களை வரும் 13-ம் தேதி நீதிமன்றத்தில் தாக்கல் செய்ய வேண்டும்” என நீதிபதி உத்தரவிட்டார்.
இந்த வழக்கின் விசாரணை இன்று தொடர்ந்து நடக்கவுள்ளது என்பது குறிப்பிடத்தக்கது.
