விஜய்யுடன் மீண்டும் ஜோடி சேருகிறார் காஜல் அகர்வால்
இளையதளபதி விஜய் நடித்த ‘துப்பாக்கி’ மற்றும் ஜில்லா என இரண்டு வெற்றி படங்களில் நடித்த நடிகை காஜல் அகர்வால் மூன்றாவது முறையாக அவருடன் ஜோடி சேரவுள்ளதாக தகவல்கள் வெளிவந்துள்ளது.
அட்லி இயக்கத்தில் விஜய் நடித்து வரும் ‘தெறி’ படத்தின் படப்பிடிப்பு கிட்டத்தட்ட முடிந்துவிட்ட நிலையில் விஜய் தனது குடும்பத்தினர்களுடன் மூன்று மாதங்கள் வெளிநாட்டில் ஓய்வு எடுக்கவுள்ளார். எனினும் பரதன் இயக்கத்தில் விஜய் நடிக்கவுள்ள ‘விஜய்60’ படத்தின் ஆரம்பகட்ட பணிகள் விறுவிறுப்பாக நடந்து வருகிறது.
இயக்குனர் பரதன் முதல்கட்டமாக இந்த படத்தின் நடிகர், நடிகைகளை இறுதி செய்யும் முயற்சியில் தீவிரமாக உள்ளார். இந்த படத்தில் விஜய்க்கு ஜோடியாக நடிக்க காஜல் அகர்வாலிடம் பேச்சுவார்த்தை நடத்தப்பட்டு வருவதாகவும், பரதன் கேட்கும் நாட்களில் காஜல் அகர்வாலிடம் கால்ஷீட் இருந்தால் அவர்தான் இந்த் படத்தின் நாயகி என்றும் கூறப்படுகிறது.
சந்தோஷ் நாராயணன் இசையமைக்கவுள்ள இந்த படம் வரும் ஏப்ரல் அல்லது மே மாதம் தொடங்கும் என எதிர்பார்க்கப்படுகிறது.
