சோனியா, ராகுல் போல் அர்த்தமில்லாமல் பேச வேண்டாம்: ‘குத்து’ ரம்யாவுக்கு நடிகரின் மனைவி ஆலோசனை
காங்கிரஸ் எம்பியும் பிரபல நடிகையுமான ‘குத்து’ ரம்யாவை, பாஜக பெண் தலைவர் ஒருவர் ஃபேஸ்புக்கில் சராமரியாக விமர்சித்துள்ளதால் பெரும் பரபரப்பு ஏற்பட்டுளது.
கர்நாடகாவைச் சேர்ந்த ரம்யா, கன்னடம், தமிழ் உள்ளிட்ட பல்வேறு மொழி திரைப்படங்களில் நடித்துள்ளார். இந்நிலையில், அவருக்கு அரசியலில் ஆர்வம் ஏற்பட்டதால், காங்கிரஸ் கட்சியில் இணைந்து, நாடாளுமன்ற தேர்தலுக்குப் போட்டியிட்டு, வெற்றிபெற்றார். இந்நிலையில், பாஜக ஆட்சிக்கு வந்தபிறகு, நாட்டில் பெண்களுக்கு பாதுகாப்பில்லை என, நடிகை ரம்யா கருத்து கூறியிருந்தார். இது பல தரப்பிலும் பரபரப்பை ஏற்படுத்திய நிலையில், கர்நாடகா பாஜக மகளிர் அணியின் துணைத் தலைவியாக உள்ள ஷில்பா, ரம்யாவுக்குப் பதிலடி கொடுத்துள்ளார்.
இதுபற்றி அவர் ஃபேஸ்புக்கில் வெளியிட்டுள்ள பதிவில், ‘’நிர்பயா விவகாரம், காங்கிரஸ் ஆட்சிக்காலத்தில் நடந்த சம்பவம் என்பதை மறந்துவிடாதீர்கள் மேடம் ரம்யா. நீங்கள் சோனியா, ராகுல் காந்தியின் விசுவாசியாக இருக்கலாம். ஆனால், அவர்களைப் போலவே அர்த்தமின்றி பேசக்கூடாது.
கர்நாடகாவில், காங்கிரஸ் கட்சி எம்எல்ஏ.,க்கள், சக பெண் உறுப்பினர்களிடம் அத்துமீறி நடந்துள்ளனர். அமைச்சர் மெட்டி உள்பட பலர் பாலியல் விவகாரத்தில் சிக்கியுள்ளனர். அவர்கள் மீது நடவடிக்கை எடுக்க, உங்கள் கட்சித் தலைமையை வலியுறுத்துவீர்களா?.
முதலில், உங்கள் கட்சியில் பெண்களுக்கு சுதந்திரம், பாதுகாப்பு கொடுக்க முயற்சி செய்யுங்கள். அதன்பின்னர், மற்றவர்களை பற்றி விமர்சிக்கலாம். உங்களுக்கு ஆங்கிலம் தெரிந்திருக்கலாம். அதற்காகப் போலியாக, அமெரிக்க குடிமகள் போன்று அதனை உச்சரிப்பது, எங்களுக்கு எரிச்சல் தருகிறது,’’ என்று அந்த ஃபேஸ்புக் பதிவில் ஷில்பா தெரிவித்துள்ளார்.
ஷில்பா வெறும் அரசியல்வாதி மட்டுமில்லீங்க. கன்னட சினிமாவின் முன்னணி நடிகர்களில் ஒருவரான கணேஷின் மனைவியும் ஆவார். அதனால்தான், ஷில்பாவின் விமர்சனம் கர்நாடகாவில் பரபரப்பாக பேசப்படுகிறது.
