ஏ.ஆர்.முருகதாஸ் இயக்கத்தில் தீபாவளி தினத்தில் உலகம் முழுவதும் மிக பிரமாண்டமாக ரிலீஸாகவுள்ள ‘கத்தி’ திரைப்படம் பிரிட்டனில் புதிய சாதனை படைக்க இருக்கின்றது. கத்தியின் தயாரிப்பு நிறுவனம் பிரிட்டனில் மிகவும் செல்வாக்காக இருப்பதால், கத்தி திரைப்படத்தை பிரிட்டனில் தங்களின் செல்வாக்கு மூலம் மிக அதிக தியேட்டர்களில் ரிலீஸ் செய்ய ஏற்பாடுகள் செய்துள்ளதாக தகவல்கள் வெளிவந்துள்ளது.
கத்தி திரைப்படத்தை பிரிட்டனில் ஐங்கரன் இண்டர்நேஷனல் மற்றும் லைக்கா புரடொக்ஷன்ஸ் ஆகிய இரண்டு நிறுவனங்களும் இணைந்து வெளியிடுகின்றது. இதுவரை எந்த ஒரு தமிழ் திரைப்படமும் ரிலீஸாகாத வகையில் பிரிட்டனில் மட்டும் கத்தி 70 தியேட்டர்களில் வெளியாக உள்ளது. மிக அதிகபட்சமாக எந்திரன் திரைப்படம் பிரிட்டனில் 55 தியேட்டர்களில் ரிலீஸானதே இதுவரை சாதனையாக இருந்தது. அந்த சாதனையை விஜய்யின் கத்தி முறியடித்துள்ளது.
அனிருத் இசையமைத்துள்ள ஆறு பாடல்களும் ஏற்கனவே உலகம் முழுவதும் சூப்பர் ஹிட் ஆகிவிட்டதால் படத்திற்கு பெரும் எதிர்பார்ப்பு ஏற்பட்டுள்ளது. இந்த படத்தை இன்னும் இரண்டு நாட்களில் சென்சார் அதிகாரிகள் பார்க்க உள்ளனர். அதன்பின்னர் படத்தின் புரமோஷன் வேலைகள் தொடங்கும் என தயாரிப்பாளர் தரப்பு தெரிவித்துள்ளது.
