கருணாநிதியுடன் குஷ்பு சந்திப்பு.
திமுகவில் நான்கு ஆண்டு காலம் இருந்த நடிகை குஷ்பு திடீரென அந்த கட்சியில் இருந்து காங்கிரஸில் இணைந்தார். கருணாநிதி குடும்பத்தினர்கள் தந்த நெருக்கடியால்தான் அவர் கட்சியில் இருந்து விலக நேரிட்டதாக கூறப்பட்டாலும், குஷ்புவுக்கு கருணாநிதி மீது என்றுமே ஒரு தனிப்பாசம் இருந்து வந்ததாக கூறப்பட்டு வருகிறது.
இந்நிலையில் வைரமுத்து எழுதிய சிறுகதைகள் நூல் வெளியீட்டு விழா நேற்று சென்னையில் நடைபெற்றது. இந்த விழாவில் திமுக தலைவர் கருணாநிதி, நடிகர் கமல்ஹாசன் உள்பட பலர் கலந்து கொண்டனர். இந்த விழாவில் கலந்து கொண்ட நடிகை குஷ்பு நீண்ட நாட்களுக்கு பின்னர் கருணாநிதியை சந்தித்து பேசினார். இந்த சந்திப்பின்போது, இருவரும் பரஸ்பரம் நலம் விசாரித்து கொண்டனர். மேலும், கருணாநிதியின் உடல் நலம் குறித்து குஷ்பு அக்கறையுடன் கேட்டறிந்ததாக கூறப்படுகிறது.
காங்கிரஸ் கட்சியில் சேர்ந்தாலும் திமுக தலைவர் கருணாநிதியை நேரில் சந்தித்து வாழ்த்து பெறுவேன் என்று அவர் ஏற்கனவே கூறியிருந்த நிலையில் நேற்று நேரில் சந்தித்து வாழ்த்து பெற்றார் என்பது குறிப்பிடத்தக்கது.
