8வது நாளாக தொடரும் லாரி வேலைநிறுத்தம்: பலகோடி சரக்குகள் தேக்கம்
லாரிகள் வேலை நிறுத்தம் இன்று 8-வது நாளை எட்டியுள்ள நிலையில், பல கோடி ரூபாய் மதிப்பிலான பொருட்கள் தேக்கமடைந்துள்ளதாக உற்பத்தியாளர்கள் வேதனை தெரிவித்துள்ளனர்.
பெட்ரோல், டீசல் விலையை ஜிஎஸ்டி வரம்புக்குள் கொண்டுவர வேண்டும், சுங்கச்சாவடிகளை அகற்றிவிட்டு ஆண்டுக்கு ஒரு முறை சுங்க கட்டணம் வசூலிக்க வேண்டும், 3ஆம் நபர் காப்பீடு கட்டண உயர்வை திரும்பப்பெற வேண்டும் ஆகிய கோரிக்கைகளை வலியுறுத்தி லாரி உரிமையாளர்கள் கடந்த 20-ஆம் தேதி முதல் காலவரையற்ற போராட்டத்தில் ஈடுபட்டு வருகின்றனர்.
இந்நிலையில் லாரிகள் வேலை நிறுத்தம் இன்று 8-வது நாளை எட்டியுள்ள நிலையில், அத்தியாவசிய பொருட்களுக்கு தட்டுப்பாடு ஏற்படும் அபாயம் ஏற்பட்டுள்ளது. கேரளாவிற்கு செல்லும் லாரிகள் மற்றும் சரக்கு வாகனங்கள் எல்லையிலேயே தடுத்து நிறுத்தப்பட்டுள்ளன. இதேபோல் பிற மாநிலங்களில் இருந்து தமிழகத்திற்கு வரவேண்டிய லாரிகளும் ஆங்காங்கே நிறுத்தப்பட்டுள்ளதால் பல ஆயிரம் கோடி மதிப்பிலான சரக்குகள் தேக்கமடைந்துள்ளன.
சரக்கு போக்குவரத்து பாதிக்கப்பட்டுள்ளதால், மத்திய அரசுக்கு நாள் ஒன்றுக்கு ஒரு லட்சம் கோடி ரூபாயும், தமிழகத்திற்கு 7 ஆயிரம் கோடி ரூபாயும் இழப்பு ஏற்பட்டுள்ளது.
இதனிடையே மத்திய அரசு லாரி உரிமையாளர்களின் நியாயமான கோரிக்கைகளை நிறைவேற்றாவிட்டால் காய்கறிகள் மட்டுமின்றி பொதுமக்கள் பயன்படுத்தும் அத்தியாவசிய பொருட்கள் விலை உயர வாய்ப்பு உள்ளதாக வியாபாரிகள் தெரிவித்துள்ளனர்.
