கமல்ஹாசன் -ஸ்ருதிஹாசன் படத்தை தயாரிக்கும் லைகா நிறுவனம்
உலகநாயகன் கமல்ஹாசனின் கனவுப்படமான ‘மருதநாயகம்’ படத்தை முடிக்க எத்தனை கோடி வேண்டுமானாலும் செலவு செய்ய தயாராக இருப்பதாக லைகா நிறுவனம் சமீபத்தில் அறிவித்ததை அடுத்து ‘மருதநாயகம்’ படத்தின் பணிகள் விரைவில் தொடங்கப்படும் என எதிர்பார்க்கப்படும் நிலையில் கமல்ஹாசன் தனது மகள் ஸ்ருதிஹாசனுடன் நடிக்கவுள்ள படத்தையும் லைகா நிறுவனமே தயாரிக்கவுள்ளதாக தற்போது செய்திகள் வெளிவந்துள்ளது.
கமல்ஹாசன், ஸ்ருதிஹாசன், ரம்யாகிருஷ்ணன் உள்பட பலர் நடிக்கவுள்ள திரைப்படம் ஒன்றை மலையாள இயக்குனர் ராஜீவ்குமார் இயக்கவுள்ள நிலையில் இந்த படத்தை பெரும் பொருட்செலவில் லைகா நிறுவனம் தயாரிக்கவுள்ளது. இதற்கான ஒப்பந்தம் விரைவில் கையெழுத்தாகும் என கூறப்படுகிறது. இந்த படத்திற்கு இசைஞானி இளையராஜா இசையமைக்கவுள்ளதாகவும் மற்ற தொழில்நுட்ப கலைஞர்களின் தேர்வு நடைபெற்று வருவதாகவும் கூறப்படுகிறது.
ஏற்கனவே லைகா நிறுவனம் தற்போது ஷங்கர் இயக்கத்தில் சூப்பர் ஸ்டார் ரஜினிகாந்த் நடிக்கும் ‘2.0’, ஜி.வி.பிரகாஷ் நடிக்கும் ‘எனக்கு இன்னொரு பேர் இருக்கு’, விஜய் ஆண்டனி நடிக்கும் ‘எமன்’ ஆகிய படங்களை தயாரித்து வரும் நிலையில் தற்போது கமல் நடிக்கும் அடுத்த படத்தையும் தயாரிக்கவுள்ளது என்பது குறிப்பிடத்தக்கது.
