உலகில் உள்ள பல நாடுகளில் இருந்து அமெரிக்காவில் உள்ள நாசா விண்வெளி ஆராய்ச்சி மையத்தில் கடந்த மாதம் அறிவியல் திறன் ஆராய்ச்சி கட்டுரைப்போட்டியில் கலந்து கொண்டனர். 30 நாடுகளில் இருந்து நூற்றுக்கணக்கான மாணவ மாணவிகள் கலந்துகொண்ட இந்த போட்டியின் முடிவுகள் தற்போது அறிவிக்கப்பட்டுள்ளன. இதில் இந்தியவை சேர்ந்த அதுவும் தமிழகத்தை சேர்ந்த ஐந்து மாணவிகள் குழு ஒன்று பரிசு பெற்று பெருமை பெற்றுள்ளனர்.
இதில், மதுரை சிம்மக்கல் ஸ்ரீசாரதா வித்யாவனம் மகளிர் மெட்ரிக் மேல்நிலை பள்ளி 11ம் வகுப்பு மாணவிகள் குழு 3ம் இடம் பிடித்தது. இவர்களுக்கு மே 14 முதல் மே 19 வரை நடைபெறும் லாஸ் ஏஞ்சல்ஸ் விழாவில் விருது வழங்கப்படுகிறது.
இதையொட்டி, மாணவிகள் குழுவினர் நேற்று அதிகாலையில் மதுரையிலிருந்து சென்னை கிளம்பிச் சென்றனர். அங்கிருந்து விமானம் மூலம் லாஸ் ஏஞ்சல்ஸ் செல்கின்றனர்.
பரிசு பெற்ற குழுவில் இருந்த விசாகா நந்தினி, செண்பகம், கமலில், திவ்யப்ரியா மற்றும் யோகலட்சுமி ஆகிய ஐந்து பேர்களும் இன்று லாஸ் ஏஞ்சல்ஸ் சென்று அடைவார்கள். 19ஆம் தேதி நடைபெறும் விழாவில் கலந்துகொண்ட பின்னர் அவர்கள் மீண்டும் வரும் 25ஆம் தேதி நாடு திரும்புவார்கள்.
