தனுஷ்-கீர்த்திசுரேஷின் பட டைட்டில் ‘மிரட்டு?
மிகவும் எதிர்பார்க்கப்பட்ட தனுஷின் ‘தங்கமகன்’ படுதோல்வி அடைந்து விநியோகிஸ்தர்களுக்கும், திரையரங்கு உரிமையாளர்களுக்கும் பெரும் நஷ்டத்தை கொடுத்த நிலையில் பிரபுசாலமன் இயக்கத்தில் தனுஷ் நடித்த அடுத்த படமாவது ஓடுமா? என்ற கேள்வி தற்போது எழுந்துள்ளது.
இந்நிலையில் இந்த படத்தின் டைட்டில் ‘ரயில்’ என்று வைக்கப்பட்டுள்ளதாக நேற்று செய்திகள் வெளிவந்தது. இந்த படம் முழுக்க முழுக்க ரயிலில் வைத்து எடுக்கப்பட்டுள்ளதால் இந்த டைட்டில் இந்த படத்திற்கு பொருத்தமாக இருக்கும் என்றும் கூறப்பட்டது. ஆனால் தற்போது வந்த புதிய தகவலின்படி இந்த படத்திற்கு ‘மிரட்டு’ என்ற டைட்டில் வைக்கப்பட்டுள்ளதாக கூறப்படுகிறது. ஏற்கனவே ‘மிரட்டல்’ என்ற டைட்டிலுடன் ஒரு படம் வெளிவந்துவிட்டதால் இந்த படத்திற்கு ‘மிரட்டு’ என்று வைக்கப்பட்டுள்ளதாக செய்திகள் வெளியாகியுள்ளது.
ரயில்வே கேண்டின் ஊழியர் பூச்சியப்பனாக தனுஷூம், ரயிலில் பயணம் செய்யும் கேரள பெண் சரோஜா கேரக்டரில் கீர்த்தி சுரேஷும் நடித்துள்ளனர். புதுடெல்லியில் இருந்து சென்னை வரும் ரயிலில் இவர்களுக்கு இடையே காதல் ஏற்பட்டது எப்படி? என்பதுதான் இந்த படத்தின் கதை. இந்த படம் வரும் மார்ச் அல்லது ஏப்ரலில் வெளியாகவுள்ளது.
