‘முடியட்டும் விடியட்டும்’ விளம்பரம் தொடரத்தான் செய்யும். மு.க.ஸ்டாலின்
கடந்த இரண்டு நாட்களாக திமுக செய்து வரும் ‘முடியட்டும் விடியட்டும்’ விளம்பரம் பெரும் பரபரப்பை ஏற்படுத்தியுள்ளது. “அம்மாவை ஸ்டிக்கர்ல பாத்துருக்கிறீங்க, பேனர்ல பாத்துருக்கிறீங்க, ஏன் டிவியில கூட பார்த்துருக்கிறீங்க… ஆனா நேர்ல பார்த்துருக்கிறீங்களா?” ‘என்னம்மா இப்படி பண்றீங்களேம்மா? என்ற விளம்பரத்தை திமுக, வானொலி, தொலைக்காட்சிகளில் அடிக்கடி ஒளிபரப்பி வருகிறது.
இந்த விளம்பரத்திற்கு அதிமுகவும் வாட்ஸ் அப்பில் பதிலடி கொடுத்தனர். அவர்கள் கொடுத்த விளம்பரத்தில் “கருணாநிதியை நடிகைங்க கல்யாணத்துல பாத்துருப்பீங்க, கலை விழால பாத்துருப்பீங்க, மானாட மயிலாடல பாத்துருப்பீங்க, ஆனா கருணாநிதிய சட்டசபைல பாத்துருக்கிறீங்களா? ஏன் திருவாருர் தொகுதியிலயவாவது பாத்துருக்கிறீங்களா?னு’ என்று இருந்தது.
இரு கட்சிகளும் மாறி மாறி அதிரடி விளம்பரங்கள் கொடுத்து வரும் நிலையில் பொதுமக்களும் மற்ற கட்சிகளை மறந்துவிட்டு இந்த இரு கட்சிகளின் விளம்பர அடிதடிகளை ரசித்து வருகின்றனர். இந்நிலையில் திமுகவின் விளம்பரத்திற்கு அதிமுக கொடுத்த பதிலடி கொடுத்து மு.க.ஸ்டாலினிடம் செய்தியாளர்கள் கேட்டபோது, “முடியட்டும் விடியட்டும் விளம்பரம் கொடுப்பது தொடரத்தான் செய்யும். பதிலுக்கு அதிமுக அவர்களுடைய கருத்துக்களை தெரிவிப்பது அவர்கள் கடமை’ என்று கூறினார். மேலும் திமுக தலைவர் கருணாநிதிக்கும் எனக்கும் மனக்கசப்பு இருப்பதாக வெளியான செய்திகள் நகைப்பிற்குரியது என்றும் திமுக தொண்டர்கள் இதை நம்ப மாட்டார்கள் என்றும் கூறினார்.
