இன்று திமுகவில் இணைகிறாரா நாஞ்சில் சம்பத்?
தனியார் தொலைக்காட்சி ஒன்றுக்கு பேட்டியளித்தபோது கட்சிக்கு விரோதமான கருத்துக்களை தெரிவித்ததாக அ.தி.மு.க.வின் கொள்கை பரப்பு துணைச் செயலாளராக இருந்த நாஞ்சில் சம்பத் சமீபத்தில் திடீரென அந்த பொறுப்பில் இருந்து விடுவிக்கப்பட்டார். இதையடுத்து, கடந்த இரு தினங்களாக நாஞ்சில் சம்பத் தி.மு.க.வில் சேர முயற்சி எடுத்து வருவதாகவும், திமுக தலைவர்களுடன் நாஞ்சில் சம்பத் தரப்பில் பேச்சுவார்த்தை நடத்தப்பட்டு வருவதாகவும் தகவல்கள் பரவிக் கொண்டிருந்தன. அதன் தொடர்ச்சியாக இன்று நாஞ்சில் சம்பத் வருகிற தி.மு.க.வில் இணையவுள்ளதாக திமுக வட்டாரங்கள் தெரிவித்துள்ளன.
இதுகுறித்து நாஞ்சில் சம்பத் விளக்கம் அளித்தபோது, “‘யாராவது வாந்தி எடுக்கிற வதந்திகளுக்கு நான் பதில் சொல்ல விரும்பவில்லை. நான் அ.தி.மு.க.வில்தான் நீடிக்கிறேன். தேர்தல் பிரசாரத்தை எப்படி எதிர்கொள்வது என்பது குறித்து, அதற்காக செய்திகளை சேகரித்துக் கொண்டிருக்கிறேன். எனக்கு ஆபத்தான காலக்கட்டத்தில் அரசியலில் அடைக்கலம் தந்து, மரணத்தோடு போராடிக் கொண்டிருந்தபோது என் உயிரை மீட்டு தந்த அம்மாவின் காலடி சுவட்டை ஒட்டி என் பயணம் தொடரும்.
நான் என்னுடைய கிராமத்து வீட்டில் இருந்து கொண்டு ஜெயகாந்தனின் சிறுகதைகள் இரண்டு தொகுப்பு, ஜெயகாந்தனின் முத்திரை கதைகள், குமரகுருபரரின் பிரபந்தங்கள் இரண்டு தொகுப்பு, விவேகானந்தர் பற்றி மகாகவி பாரதி கூறியது, பிள்ளைப் பெருமான் அய்யங்கார் எழுதிய அச்சபிரபந்தம் ஆகிய நூல்களை வாசித்து கொண்டிருக்கிறேன். எந்த சலனத்திற்கும் ஆட்படாமல் என் வீட்டில் உட்கார்ந்து நான் அமைதியாக படித்துக் கொண்டிருக்கிறேன்.
வலைத்தளங்களில் வருகின்ற செய்திகளை நான் பார்ப்பதில்லை. ஆகவே, இதுபோன்ற வலைத்தளங்களில் வைரஸாக வரும் இந்த ஆபத்தான செய்திகளை கண்டு யாரும் ஏமாற வேண்டாம்” என்று கூறினார்.
