சென்னையில் ‘கபாலி’ பிரிமியர் காட்சி இல்லை. தாணு அறிவிப்பு
ரஜினி, கமல், அஜித், விஜய் போன்ற பெரிய ஸ்டார்களின் படங்கள் ரிலீஸ் ஆகும்போது வெளிநாட்டில் ரிலீசுக்கு முந்தைய நாள் பிரிமியர் காட்சி திரையிடப்படுவது வழக்கம்.
அதேபோல் வரும் ஜூலை 22ஆம் தேதி ரிலீஸ் ஆகவுள்ள ‘கபாலி’ படத்தின் பிரிமியர் காட்சி கிட்டத்தட்ட அனைத்து முக்கிய நாடுகளிலும் திரையிடப்படவுள்ளதாக அறிவிக்கப்பட்டு அதற்கான டிக்கெட்டுக்களும் விற்பனையாகி முடிந்துவிட்டது.
இந்நிலையில் முதன்முதலாக சென்னையில் ரிலீசுக்கு முந்தைய நாள் அதாவது ஜூலை 21ஆம் தேதி மாலையில் ‘கபாலி’ பிரிமியர் காட்சி திரையிட திட்டமிடப்பட்டுள்ளதாக கூறப்பட்டது. ஆனால் இந்த தகவலை கலைப்புலி எஸ்.தாணு மறுத்துள்ளார்.
இந்த படம் ஜூலை 22ஆம் தேதி காலையில்தான் முதல்காட்சி சென்னையில் திரையிடப்படவுள்ளதாகவும், முந்தைய நாள் மாலை பிரிமியர் காட்சி இல்லை என்றும் தாணு கூறியுள்ளார். இதனால் ரஜினி ரசிகர்கள் ஏமாற்றம் அடைந்துள்ளனர். ஆயினும் இந்த படத்தின் நடுநிசிக்காட்சி, அதிகாலை காட்சி இருக்கும் என நம்பப்படுகிறது.
