காங்கிரஸ் கட்சித் துணைத்தலைவரும், சோனியாகாந்தியின் புதல்வருமான ராகுல் காந்தி பிரபல சமூக வலைதளமான டுவிட்டரில் இன்று இணைந்துள்ளார்.
ஃபேஸ்புக், டிவிட்டர் போன்ற சமூக வலைதளங்களில் மோடி உள்பட பெரும்பாலான அரசியல் கட்சித்தலைவர்கள் இணைந்து தங்கள் கருத்துக்களை தெரிவித்து வரும் நிலையில், காங்கிரஸ் கட்சியின் முக்கிய தலைவராக விளங்கும் ராகுல் காந்தி இதுவரை அதுபோன்று எந்த சமூக வலைதளங்களை பயன்படுத்தாமல் இருந்தது குறித்து தொடர்ந்து விமர்சனங்கள் எழுந்து வந்தது.
இந்நிலையில் இன்று முதல் ராகுல் காந்தியும் டுவிட்டர் தளத்தில் தன்னை இணைத்து கொண்டார். ‘OfficeOfRG’ என்ற பெயரில் அவரது டிவிட்டர் கணக்கு தொடங்கப்பட்டுள்ளது. ராகுல்காந்தி டுவிட்டர் கணக்கை தொடங்கிய முதல் நாளே அவரை 31, 000 க்கும் அதிகமானோர் பின் தொடருகிறார்கள். நாடாளுமன்ற உறுப்பினரும், அகில இந்திய காங்கிரஸ் கட்சியின் துணைத் தலைவருமான ராகுல் காந்தியின் அதிகாரப்பூர்வ டிவிட்டர் தளம் இது என்ற அறிவிப்பும் அதில் இடம்பெற்றுள்ளது.
முன்னதாக ராகுல் காந்தி, 57 நாட்கள் ரகசியமாக வெளிநாட்டில் தங்கி இருந்தது கடும் விமர்சனங்களை ஏற்படுத்தி இருந்தது குறிப்பிடத்தக்கது.
