பள்ளிகளுக்கு மீண்டும் ஒரு வாரம் விடுமுறை. பள்ளிக்கல்வி இயக்குனர் அறிவிப்ப்பு
சென்னை உள்பட தமிழகத்தின் பல பகுதிகளில் கனமழை மற்றும் வெள்ளம் காரணமாக ஒரு மாதத்திற்கு மேலாக பள்ளிகள் விடுமுறை விடப்பட்டு சமீபத்தில்தான் மீண்டும் பள்ளி தொடங்கியுள்ளது. இந்நிலையில் மீண்டும் ஒருவாரம் பள்ளிகளுக்கு விடுமுறை என பள்ளிக்கல்வி இயக்குனர் தெரிவித்துள்ளார்.
டிசம்பர் 24-ம் தேதி மிலாது நபி, 25-ம் தேதி கிறிஸ்துமஸ், ஜனவரி 1-ம் தேதி புத்தாண்டு ஆகியவை வருவதை முன்னிட்டு பள்ளிகளுக்கு விடுமுறை இருக்குமா? என ஆசிரியர்களும் மாணவர்களும் குழம்பிக்கொண்டிருந்த நிலையில் இன்று பள்ளிக்கல்வி துறை இயக்குனர் ச.கண்ணப்பன் இதுகுறித்து விளக்கம் அளித்துள்ளார்.
அவர் கூறியதாவது: ”சென்னை, திருவள்ளூர், காஞ்சிபுரம், கடலூர் ஆகிய 4 மாவட்டங்களில் எஸ்.எஸ்.எல்.சி., பிளஸ்-2 மாணவர்களுக்கு சிறப்பு வகுப்புகள் வருகின்ற 24, 25, 27 மற்றும் ஜனவரி 1-ம் தேதி ஆகிய 4 நாட்கள் மட்டும் நடத்தக் கூடாது. மற்ற நாட்களில் சிறப்பு வகுப்புகள் இந்த 4 மாவட்டங்களில் மட்டும் நடத்தப்பட வேண்டும்.
மேலும், 2015-2016-ம் கல்வி ஆண்டுக்கான பள்ளிக்கூட விடுமுறைகள் ஏற்கனவே முடிவு செய்யப்பட்டு அச்சிடப்பட்டு உள்ளது. அதன்படி தமிழ்நாடு முழுவதும் அனைத்து பள்ளிகளுக்கும் 24-ம் தேதி முதல் ஜனவரி 1-ம் தேதி வரை விடுமுறைவிடப்பட்டுள்ளது. மிலாது நபி, கிறிஸ்துமஸ், புத்தாண்டு விழாக்களும் இந்த விடுமுறையில் அடங்கும்” என்று தெரிவித்து உள்ளார்
