லாரியில் குடிநீர் பெற ஆன்லைன் மூலம் வசதி. சென்னை குடிநீர் வாரியம் தகவல்
சென்னை நகரில் லாரிகள் மூலம் குடிநீர் பெற விரும்புவோர் இணையதளம் வாயிலாக முன்பதிவு செய்யும் வசதி அறிமுகம் செய்யப்பட்டுள்ளதாக சென்னை குடிநீர் வாரியம் தெரிவித்துள்ளது.
இது குறித்து சென்னை குடிநீர் வாரியம் வெளியிட்ட செய்திக் குறிப்பு ஒன்றில் குறிப்பிடப்பட்டுள்ளதாவது: லாரி மூலம் குடிநீர் பெற விரும்பும் பொதுமக்கள், தற்போது வரை குடியிருப்பு பகுதிகளுக்கு உட்பட்ட நீர் நிரப்பு மையங்களில் மட்டுமே பதிவு செய்து குடிநீர் பெற்று வருகின்றனர். இந்த முறையை எளிமைப்படுத்தும் விதமாக, இரு புதிய வசதிகளை சென்னை குடிநீர் வாரியம் அறிமுகப்படுத்தியுள்ளது.
அதன்படி, குடிநீர் வாரியத்தின் இணையதளமான www.chennaimetrowater.com -ல் ஆன்லைன் முறையில் குடிநீர் தேவை குறித்து முன்பதிவு செய்துகொள்ளலாம். அவ்வாறு செய்யும்போது, பயனாளியின் தொலைபேசி எண்ணுக்கு குறுஞ்செய்தி வாயிலாக முன்பதிவு மேற்கொண்டதன் உறுதி தகவல் அனுப்பப்படும். இந்த நடைமுறையில் தாமதம் ஏதேனும் இருப்பின், அது தொடர்பாக இணையதளம் மூலமாகவே புகார் தெரிவிக்கலாம் என்றும் கூறப்பட்டுள்ளது.
மேலும் குடிநீர் வாரியத்தின் தலைமை அலுவலகத்தில் தற்போது திறக்கப்பட்டுள்ள ஒருமுகப் படுத்தப்பட்ட முன்பதிவு மையத்தை, 044- 45674567 என்ற எண்ணில் தொடர்புகொண்டு, லாரிகள் மூலம் குடிநீர் பெற்றுக்கொள்ளலாம். இந்த இரு சேவைகளும் வரும் 8-ம் தேதி முதல் நடைமுறைப் படுத்தப்படுகிறது. முதலில் பதிவு செய்பவர்களுக்கு முதல் முன்னுரிமை அடிப்படையில், எந்த வித தாமதமுமின்றி குடிநீர் வழங்கப்படும். அந்தந்த நீர் நிரப்பு மையங்களில் தொலைபேசி மூலம் குடிநீர் கேட்டு பதிவு செய்யும் நடை முறையும் தொடர்ந்து அமலில் இருக்கும். இவ்வாறு செய்திக் குறிப்பில் கூறப்பட்டுள்ளது.
