தமிழகத்தின் அடுத்த முதல்வராக ஓ.பன்னீர் செல்வம் இன்று மதியத்திற்கு மேல் பதவியேற்கவுள்ளதாக தலைமைச்செயலக வட்டாரத்தில் இருந்து தகவல்கள் வெளிவந்துள்ளது. ஆளுநர் மாளிகையில் நடைபெறும் எளிமையான பதவியேற்பு விழாவில் பன்னீர்செல்வத்துடன் புதிய அமைச்சர்கள் சிலரும் பதவியேற்கவுள்ளனர். முதல்வர் பன்னீர்செல்வத்திற்கு, புதிய அமைச்சர்களுக்கும் கவர்னர் ரோசய்யா பதவிப் பிரமாணமும் ரகசியக் காப்புப் பிரமாணமும் இன்று செய்து வைப்பார்.
ஓ.பன்னீர் செல்வம் முதல்வராக பதவியேற்கும் நிகழ்ச்சி எந்த நேரத்தில் நடைபெறும் என்று உறுதியாக தெரியாவிட்டாலும் இன்று பிற்பகல் 12 மணிக்கு மேல் பதவியேற்பு விழா நடைபெறும் என கூறப்படுகிறது. அ.தி.மு.க. பொருளாளராகவும் நிதியமைச்சராகவும் இருந்து வரும் பன்னீர்செல்வத்திற்கு 63 வயது ஆகிறது. இவருக்கு விஜயலட்சுமி என்ற மனைவியும், ரவீந்திரநாத்குமார், ஜெயபிரதீப் என்ற 2 மகன்களும், கவிதாபானு என்ற மகளும் உள்ளனர்.
நேற்று நடந்த அதிமுக எம்.எல்.ஏக்கள் கூட்டத்தில் புதிய சட்டமன்ற கட்சித் தலைவராக ஓ.பன்னீர்செல்வம் ஒருமனதாக தேர்வு செய்யப்பட்டார். இதையடுத்து அவர் கவர்னர் ரோசய்யாவை சந்தித்து ஆட்சியமைக்க உரிமை கோரினார். அவருடைய கோரிக்கையை ஏற்றுக்கொண்ட கவர்னர் ஆட்சியமைக்க வருமாறு பன்னீர் செல்வத்திற்கு கவர்னர் ரோசய்யா அழைப்பு விடுத்தார்.
தேனி மாவட்டம் பெரியகுளத்தில் பிறந்தவர் ஓ.பன்னீர் செல்வம். பி.ஏ. படித்துள்ள இவர் பெரியகுளம் நகராட்சித் தலைவராகவும், நகர அ.தி. மு.க. செயலாளராகவும் பதவி வகித்து உள்ளார். 2001-ம் ஆண்டு பெரியகுளம் சட்டசபை தொகுதியில் போட்டியிட்டு வெற்றி பெற்ற ஓ.பன்னீர்செல்வம் அப்போது வருவாய்த்துறை அமைச்சராக நியமிக்கப்பட்டார். பின்னர் டான்சி நில வழக்கில் ஜெயலலிதா தண்டனை பெற்றபோது, 2001-ம் ஆண்டு செப்டம்பர் மாதம் 21ம் தேதி முதல் 2002-ம் ஆண்டு மார்ச் மாதம் வரை முதல்வராகப் பணியாற்றினார்.
பின்பு ஜெயலலிதா மீண்டும் முதல்-அமைச்சராக பொறுப்பு ஏற்றவுடன், பொதுப்பணி, மதுவிலக்குமற்றும் ஆயத்தீர்வைத்துறை அமைச்சராக பணியாற்றினார். 2006-ம் ஆண்டு நடந்த பொதுத்தேர்தலில் பெரியகுளம் சட்டசபை தொகுதியில் இருந்து உறுப்பினராக தேர்ந்தெடுக்கப்பட்ட அவர் எதிர்க் கட்சி தலைவராக பணியாற்றினார்.
