மதராசப்பட்டணம், தெய்வத்திருமகள், தலைவா போன்ற படங்களை இயக்கிய ஏ.எல்.விஜய் தற்போது இயக்கி முடித்துள்ள திரைப்படம் ‘இது என்ன மாயம்’. விக்ரம் பிரபு, கீர்த்தி சுரேஷ் நடித்துள்ள இந்த படம் வெகுவிரைவில் ரிலீஸாகவுள்ளது. இந்நிலையில் ஏ.எல்.விஜய் அடுத்த படத்திற்கான ஆரம்பகட்ட பணியை ஆரம்பித்துள்ளதாக செய்திகள் வெளிவந்துள்ளது.
விஜய் இயக்கத்தில் உருவாகவுள்ள அடுத்த படத்தில் பிரபுதேவா ஹீரோவாக நடிக்கவுள்ளதாக கூறப்படுகிறது. சமீபத்தில் பிரபுதேவாவை நேரில் சந்தித்த விஜய், அவரிடம் ஒரு கதையை கூறியதாகவும், அந்த கதை பிரபுதேவாவுக்கு மிகவும் பிடித்துவிட்டதால் அதில் நடிக்க ஒப்புக்கொண்டதாகவும் கூறப்படுகிறது. இந்த படத்தின் கதை முழுக்க முழுக்க காமெடியை மையமாக கொண்டது என கூறப்படுகிறது.
பிரபுதேவா ‘தோனி’ படத்திற்கு பின்னர் தமிழில் வேறு படங்களில் நடிக்கவில்லை. அவர் இந்தியில் படம் இயக்குவதில் பிசியாக இருந்ததால் கோலிவுட் பக்கம் அவரால் எட்டிப்பார்க்க முடியவில்லை. சமீபத்தில் பிரபுதேவா இயக்கத்தில் வெளியான ‘ஆக்சன் ஜாக்சன்’ படம் பாலிவுட்டில் படுதோல்வி அடைந்ததை அடுத்து அவர் மீண்டும் நடிப்பில் களமிறங்கியதாக கூறப்படுகிறது.
