காஞ்சிபுரத்தில் வருகிற 22-ஆம் தேதி, தனியார் துறை வேலைவாய்ப்பு முகாம் நடைபெற உள்ளதாக ஆட்சியர் வே.க. சண்முகம் தெரிவித்தார்.
இதுகுறித்து அவர் வெளியிட்ட செய்திக்குறிப்பு:
காஞ்சிபுரம் மாவட்ட வேலைவாய்ப்பு அலுவலகம் சார்பில், தனியார் துறை வேலைவாய்ப்பு முகாம் காஞ்சிபுரம் ரங்கசாமிகுளம் அருகே உள்ள அ.கு. தங்கவேலு உயர்நிலைப் பள்ளியில் வருகிற 22-ஆம் தேதி காலை 10 மணியளவில் நடைபெற உள்ளது.
முகாமில், பல முன்னணி நிறுவனங்கள் கலந்து கொண்டு தங்களது நிறுவனத்துக்குத் தேவையான ஆள்களை தேர்வு செய்ய உள்ளனர். எனவே, காஞ்சிபுரம் மாவட்டத்தைச் சேர்ந்த வேலைவாய்ப்பற்ற 10-ஆம் வகுப்பு தேர்ச்சி பெற்றவர்கள், தேர்ச்சி பெறாதவர்கள், பிளஸ்2 தேர்ச்சி பெற்றவர்கள், பட்டப் படிப்பு, பட்டயப் படிப்பு, ஐடிஐ உள்ளிட்ட கல்வித் தகுதியுடைய 18 வயதுக்கு மேற்பட்ட ஆண், பெண் இருபாலரும் தங்களது கல்வி, இதர சான்றிதழ்களுடன், பாஸ்போர்ட் சைஸ் புகைப்படங்களுடன் முகாமில் கலந்து கொள்ளலாம் என்று அறிவிக்கப்பட்டுள்ளது.
