பிரச்சாரம் செய்யாதே! திரும்பிப்போ..சி.ஆர்.சரஸ்வதி மீது அழுகிய தக்காளிய வீசிய ஆர்.கே.நகர் மக்கள்
சென்னை ஆர்.கே நகர் இடைத்தேர்தல் வாக்கு சேகரிப்பில் ஈடுபட்ட அதிமுக அம்மா அணியை சேர்ந்த சி.ஆர்.சரஸ்வதி மீது அப்பகுதி மக்கள் அழுகிய தக்காளி மற்றும் காய்கறிகள், பழங்களை வீசி தங்களது எதிர்ப்பு தெரிவித்ததால் பெரும் பரபரப்பு ஏற்பட்டுள்ளது.
ஆர்.கே.நகர் பிரச்சாரம் தற்போது உச்சக்கட்டத்தில் இருக்கும் நிலையில் அதிமுகவின் சசிகலா அணியை சேர்ந்த சி.ஆர்.சரஸ்வதி, அதிமுக அம்மா அணி வேட்பாளர் டிடிவி தினகரனை ஆதரித்து நேற்றிரவு ஆர்கே நகரில் பிரச்சாரம் செய்தார். சிஆர் சரஸ்வதி திறந்த ஜீப்பில் ஆர்கே நகர் மார்க்கெட் அருகில் பிரச்சாரம் செய்து கொண்டிருந்தபோது, அங்கு வந்த அதிமுக விசுவாசிகள் ‘ஜெயலலிதா மருத்துவமனையில் இருக்கும்போது இட்லி சாப்பிட்டார், இடியாப்பம் சாப்பிட்டார் என்று சொன்னீங்களே, ஆனா ஜெயலலிதாவை பிணமா தானே கொண்டு வந்தீங்க’ என்று காட்டமாககேள்வி எழுப்பியதோடு, இங்கு பிரச்சாரத்திற்கு வராதீர்கள், திரும்பி செல்லுங்கள்’ என்று கோஷமிட்டனர்.
இதனால் பெரும் தர்மசங்கடத்திற்கு ஆளான சி.ஆர்.சரஸ்வதி வேறு வழியில்லாமல் திரும்பி சென்றார். அப்போது அவர் மீது அங்கிருந்த பெண்கள் அழுகிய தக்காளி, காய்கறிகளை எடுத்து சரஸ்வதி மீது வீசினர். இதனால் அப்பகுதியில் பெரும் பரபரப்பு ஏற்பட்டது.
