விஜய்யின் ‘புலி’ ரிலீஸ் தள்ளி வைத்ததற்கு அஜீத் இயக்குனர் காரணமா? திடுக்கிடும் தகவல்
இளையதளபதி விஜய் நடித்த ‘புலி’ திரைப்படத்தின் ரிலீஸ் தேதி செப்டம்பர் 17ஆம் தேதியில் இருந்து திடீரென அக்டோபர் 1ஆம் தேதிக்கு மாற்றப்பட்டது. இதற்கு கம்ப்யூட்டர் கிராபிக்ஸ் பணிகள் இன்னும் முடியவில்லை என்ற காரணமே படக்குழுவினர் தரப்பில் கூறப்பட்டது. ஆனால் சமூக வலைத்தளங்களான ஃபேஸ்புக் மற்றும் டுவிட்டரில் இந்த படம் தள்ளி வைக்கப்பட்டதற்கு காரணம் அஜீத் இயக்குனர் என செய்திகள் வெளிவந்துள்ளது.
அஜீத்தை வைத்து பில்லா, ஆரம்பம் என இரண்டு படங்களை இயக்கிய இயக்குனர் விஷ்ணுவர்தன், தற்போது இயக்கி முடித்துள்ள படம் ‘யட்சன்’. ஆர்யா, கிருஷ்ணா, தீபா சந்நிதி, ஸ்வேதா ரெட்டி மற்றும் பலர் நடித்துள்ள இந்த படம் மிகப்பெரிய எதிர்பார்ப்பை ஏற்படுத்தியுள்ளது. அஜீத் ரசிகராக ஆர்யா இந்த படத்தில் நடித்துள்ளதால் அஜீத் ரசிகர்களின் முழுமையான ஆதரவு கிடைக்கும் என நம்பப்படுகிறது.
யட்சன் திரைப்படம் வரும் செப்டம்பர் 11 முதல் ரிலீசாகவுள்ளதாக இந்த படத்தின் தயாரிப்பு நிறுவனமான யூடிவி அதிகாரபூர்வமாக அறிவித்துள்ளது. மேலும் இந்த படத்திற்காக பல முக்கிய திரையரங்குகள் தமிழகமெங்கும் ஏற்கனவே புக் செய்யப்பட்டுவிட்டது. இந்நிலையில் செப்டம்பர் 17ல் விஜய்யின் புலி ரிலீசானால், எதிர்பார்த்த அளவு மிக அதிகமான திரையரங்குகள் ‘புலி’ படத்திற்கு கிடைக்கும் வாய்ப்பு குறைவு என்ற காரணத்தினால்தான் ‘புலி’ படத்தின் ரிலீஸ் தேதி தள்ளி வைக்கப்பட்டதாக கூறப்படுகிறது. இதற்காகவே டுவிட்டரில் ஒரு கூட்டம் #PuliBackedDueToYatchan என்ற ஹேஷ்டேக்கை உருவாக்கி அதையும் டிரெண்டாக்கி வருகின்றனர் என்பது குறிப்பிடத்தக்கது.
