விஜய், ஸ்ருதிஹாசன் ஆகியோர் தாய்லாந்து மற்றும் கம்போடியாவில் கடந்த சில நாட்களாக ‘புலி’ படத்தின் இறுதிக்கட்ட படப்பிடிப்பில் இருந்த நிலையில் இந்த படத்தின் படப்பிடிப்பு நேற்றுடன் முடிந்துவிட்டதாக அறிவிக்கப்பட்டுள்ளது. இந்த தகவலை ஸ்ருதிஹாசன் தனது டுவிட்டரில் உறுதி செய்துள்ளார்.
தாய்லாந்தில் உள்ள புலி கோவில் ஒன்றில் கடைசி நாள் படப்பிடிப்பு முடிந்தவுடன் பூஜை செய்ததாகவும், அந்த பூஜையின் புகைப்படத்தை ஸ்ருதிஹாசன் தனது இன்ஸ்டாகிராம் வலைத்தளத்தில் பதிவு செய்து படப்பிடிப்பு முடிந்த தகவலையும் உறுதி செய்துள்ளார்.
புலி படத்தின் படப்பிடிப்பு முற்றிலும் முடிந்துவிட்டதால் இந்த படத்தின் கிராபிக்ஸ் பணிகள் விறுவிறுப்புடன் அடுத்த வாரம் முதல் தொடங்கும் என கூறப்படுகிறது. இந்த படம் தெலுங்கில் உருவாகி வரும் பாஹுபாலி படத்திற்கு இணையாக கிராபிக்ஸ் பணியை மேற்கோள்ள இருப்பதாகவும், அதற்கெனவே ஒரு பெரிய தொகை தயாரிப்பாளர் தரப்பில் இருந்து ஒதுக்கியுள்ளதாகவும் கூறப்படுகிறது.
இந்த படம் முதலில் ஆகஸ்ட் 15ஆம்தேதி ரிலீஸாகவிருப்பதாக கூறப்பட்டது. ஆனால் கிராபிக்ஸ் பணிகளுக்கு குறைந்தது மூன்று மாதங்கள் தேவை என கூறப்பட்டதால் தற்போது படத்தை செப்டம்பர் 17ஆம் தேதி ரிலீஸ் செய்ய முடிவு செய்யப்பட்டுள்ளது. இதே தேதியில்தான் விஷாலின் ‘பாயும் புலி’ திரைப்படமும் ரிலீஸ் ஆகிறது என்பது குறிப்பிடத்தக்கது.
