மும்பையில் மராட்டியர்கள் அல்லாதவர்களின் ஆட்டோக்களை தீவைத்து எரியுங்கள். ராஜ்தாக்கரேயின் சர்ச்சை பேச்சால் பரபரப்பு
நவநிர்மான் சேனா கட்சியின் தலைவர் ராஜ் தாக்கரே அவ்வப்போது மராட்டியர்கள் அல்லதவர்கள் குறித்து சர்ச்சைக்குரிய வகையில் பேசி வரும் நிலையில் நேற்று மும்பையில் மராட்டியர்கள் அல்லாதவர்கள் யாரேனும் ஆட்டோ ஓட்டினால், ஆட்டோவில் உள்ளவர்களை இறக்கிவிட்டு பின்னர் அந்த ஆட்டோக்களை தீவைத்து எரியுங்கள் என்று கூறியுள்ளதால் பெரும் பரபரப்பு ஏற்பட்டுள்ளது. இந்த அராஜக பேச்சுக்கு காங்கிரஸ் உள்பட எதிர்க்கட்சிகள் அனைத்தும் கண்டனம் தெரிவித்துள்ளது.
நேற்று மும்பையில் நடைபெற்ற நவநிர்மான் சேனா கட்சிக் கூட்டம் ஒன்றில் பேசிய அக்கட்சியில் தலைவர் ராஜ் தாக்கரே,” பாரதிய ஜனதா அரசின் செயல்பாடு காரணமாக மும்பையில் வெளி மாநிலத்தை சேர்ந்த 70 சதவீதம் பேருக்கு புதிய ஆட்டோக்களுக்கு பெர்மிட் வழங்கப்பட்டுள்ளது. பெர்மிட் வழங்கப்பட்டதில் முறைகேடு நடந்துள்ளது. மும்பையில் புதியதாக பதிவு செய்யப்பட்டுள்ள ஆட்டோக்களை மராட்டியர்களை தவிர வேறு ஒருவர் ஓட்டினால், உடனடியாக அதனை எரித்து விடுங்கள்.
முந்தைய காங்கிரஸ் அரசு போலவே தற்போதைய பாரதிய ஜனதா அரசும் மராட்டியர்களுக்கு எதிராக செயல்படுகிறது. சொல்லப் போனால் முந்தைய காங்கிரஸ் ஆட்சி கூட பரவாயில்லை. மராட்டிய இளைஞர்களும் இளைஞிகளும் இந்த அரசால் பாதிப்புக்குள்ளாகியிருக்கின்றனர். தற்போது புதியதாக 70 ஆயிரம் ஆட்டோக்களுக்கு அரசு பெர்மிட் வழங்கியுள்ளது.
புதிய பதிவு எண்ணுடன் மராட்டியர்கள் அல்லாதவர்கள் ஓட்டும் ஆட்டோவை நீங்கள் பார்த்தால், அதில் இருந்து பயணிகளை இறங்குமாறு கூறி விட்டு, ஆட்டோவுக்கு தீ வைத்து விடுங்கள். பாரதிய ஜனதா ஆட்சி, பஜாஜ் ஆட்டோ நிர்வாகத்துக்கு சாதகமாக செயல்படுகிறது. புதிய ஆட்டோக்களுக்கு பெர்மிட் வழங்கியதில் அந்த நிறுவனத்துக்கு 1,190 கோடி ரூபாய் வருமானத்திற்கு வழி செய்துள்ளது. மகாராஷ்டிர முதல்வர் தேவேந்திர பட்னாவிஸ் இதற்கு சரியான விளக்கமளிக்க வேண்டும் என்று கூறியுள்ளார்.
