விஷால் தலைமையில் ரஜினி-கமல் ஆடும் கிரிக்கெட் போட்டி?
தென்னிந்திய நடிகர் சங்கத்தின் புதிய நிர்வாகிகளாக பொறுப்பேற்ற நாசர், விஷால், கார்த்தி உள்பட அனைத்து நிர்வாகிகளும் புதிய நடிகர் சங்க கட்டிடம் கட்டும் முயற்சியில் தீவிரமாக ஈடுபட்டு வருகின்றனர். இந்நிலையில் இந்த கட்டிடம் கட்டுவதற்கு நிதி திரட்ட வரும் ஏப்ரல் 10ஆம் தேதி நட்சத்திர கிரிக்கெட் போட்டி ஒன்றை நடத்த திட்டமிட்டுள்ளனர்.
இந்த போட்டியில் கோலிவுட் திரையுலகின் முக்கிய நட்சத்திரங்கள் அனைவரும் கலந்து கொள்ளவுள்ள நிலையில் ரஜினியும், கமலும் கலந்து கொள்ள ஒப்புக்கொண்டுள்ளதாக விஷால் தெரிவித்துள்ளார். இன்று அவன் அவள்’ என்ற படத்தின் இசை வெளியீட்டு விழாவில் கலந்து கொண்ட விஷால் இந்த தகவலை பத்திரிகையாளர்கள் முன் தெரிவித்தார்.
விஷால் தலைமையில் ஒரு அணியும், கார்த்தி தலைமையில் ஒரு அணியும் மோதும் என்றும் இந்த போட்டியில் ரஜினி, கமல் கலந்து கொள்ள இருப்பதாகவும் கூறப்படுகிறது. ரஜினி-கமல் பார்வையாளர்களாக மட்டும் இருப்பார்களா? அல்லது போட்டியில் கலந்து கொண்டு விளையாடுவார்களா? என்பது குறித்த தகவல் இல்லை.
