அஜித்தை எனக்கு நன்றாக தெரியும். அவர் அப்படி கூறியிருக்கவே மாட்டார். எஸ்.வி.சேகர்
நாசர் தலைமையிலான தென்னிந்திய நடிகர் சங்கம் ‘நட்சத்திர கிரிக்கெட் போட்டியை சமீபத்தில் வெற்றிகரமாக நடத்தி முடித்தது. இந்த போட்டியின் மூலம் ரூ.13 கோடி வருமானம் வந்ததாகவும், அதன் மூலம் நடிகர் சங்க கடனை அடைத்துவிட்டதாகவும் சமீபத்தில் விஷால் தனது டுவிட்டரில் தெரிவித்தார். ஆனாலும் இந்த போட்டியை நடத்த திட்டமிட்ட நாளில் இருந்து தொடர்ந்து பல சர்ச்சைக்குரிய கருத்துக்கள் நடிகர்கள் தரப்பில் இருந்தும் பொதுமக்கள் தரப்பில் இருந்தும் வெளிவந்து கொண்டே இருக்கின்றது. முக்கியமாக இந்த போட்டி குறித்து அஜித் சர்ச்சைக்குரிய கருத்தை கூறியதாக பல்வேறு ஊடகங்களில் செய்தி வெளியானது.
நடிகர் சங்கத்திற்கு என சொந்த கட்டிடம் கட்டுவதற்கு அனைத்து நடிகர்களும் அவரவர் தகுதிக்கு தகுந்தவாறு பணம் போடலாம் என்றும் நடிகர் சங்க கட்டிடம் கட்ட பொதுமக்களிடம் வசூல் செய்வது சரியில்லாத ஒன்று என்றும் அஜித் கூறியதாக செய்திகள் வெளிவந்தது. இதுகுறித்து நடிகர் சங்கத்தின் சீனியர் உறுப்பினரும் அஜித்தின் நெருங்கிய நண்பருமான எஸ்.வி.சேகர் கூறியுள்ள கருத்தை தற்போது பார்ப்போம்.
நட்சத்திர கிரிக்கெட் குறித்தும், நடிகர் சங்க கட்டிடத்திற்கு கட்டிடம் கட்டுவதற்கு பணம் திரட்டுவது குறித்தும் அஜித் இதுவரை எந்த பத்திரிகை, அல்லது தொலைக்காட்சி பேட்டியிலும் கருத்து கூறவில்லை. அவர் கூறியதாக வந்த கற்பனைக்கருத்துக்கள் தான் பல்வேறு ஊடகங்களில் வதந்தியாக பரவியுள்ளது. அஜித், ஒரு தனிப்பட்ட நபரிடமோ அல்லது சங்கத்திடமோ ஏதாவது கருத்தை கூற வேண்டுமானால் நேரடியாக தைரியமாக சொல்லும் வகையை சேர்ந்தவர். உண்மை இவ்வாறு இருக்க அவர் கூறியதாக வந்த கற்பனைக்கருத்துக்களை ஊடகங்கள்தான் பெரிதாக்கியுள்ளது’ என்று கூறியுள்ளார்.
