அமெரிக்காவில் நடைபெற்று வரும் மியாமி ஓபன் டென்னிஸ் போட்டியில் சானியா மிர்சா-மார்ட்டினா ஹிங்கிஸ் ஜோடி சாம்பியன் பட்டம் வென்றுள்ளது.
மியாமி ஓபன் டென்னிஸ் போட்டியின் மகளிர் இரட்டையர் பிரிவில் இன்று நடைபெற்ற விறுவிறுப்பான இறுதி ஆட்டத்தில், டென்னிஸ் தரவரிசை பட்டியலில் முதல்நிலை ஜோடியான சானியா- ஹிங்கிஸ் ஜோடி, தரவரிசை பட்டியலில் 2-ம் நிலையில் உள்ள எலெனா வெஸ்னினா-எகடரினா மகரோவா ஜோடியை எதிர்த்து விளையாடியது. . முதல் செட்டில் கடும் போட்டி இருந்த போதிலும் 7-5 என்ற புள்ளிக்கணக்கில் சானியா-ஹிங்கிஸ் ஜோடி கைப்பற்றியது.
இரண்டாவது செட்டை 6-1 என்ற கணக்கில் எளிதாக கைப்பற்றிய இந்த ஜோடி 66 நிமிடத்திலேயே ஆட்டத்தை வென்று சாம்பியன் பட்டத்தை கைப்பற்றியது. இரண்டு வாரங்களுக்கு முன் பி.என்.பி. பாரிபாஸ் ஓபன் பைனலில் சாம்பியன் பட்டம் வென்ற சானியா-ஹிங்கிஸ் ஜோடி, அதே வேகத்தில் மியாமி ஓபன் இறுதிப்போட்டியிலும் வெற்றி பெற்று கோப்பையை கைப்பற்றியுள்ளது குறிப்பிடத்தக்கது.
