டென்னிஸ் வீராங்கனை சானியா மிர்சா தங்கைக்கு இன்று நிச்சயதார்த்தம்
சமீபத்தில் அமெரிக்க ஓபன் டென்னிஸ் இரட்டை மகளிர் சாம்பியன் பட்டம் வென்ற மகிழ்ச்சியில் உள்ள சானியா மிர்சாவுக்கு அடுத்த சந்தோஷமான செய்தி கிடைத்துள்ளது. சானியாவின் தங்கை அனம் மிர்சாவுக்கு விரைவில் திருமணம் என்பதுதான் அந்த செய்தி.
ஐதராபாத்தில் விளம்பர நிறுவனம் நடத்தி வரும் தொழிலதிபர் அக்பர் ரஷீத்தும் சானியாவின் தங்கை அனம் மிர்சாவும் கடந்த ஓராண்டாக காதலித்து வருகிறார்கள். இவர்களது காதலுக்கு பெற்றோரும் ‘பச்சைக்கொடி’ காட்டி விட்டதால் இன்று ஐதராபாத்தில் உள்ள நட்சத்திர ஓட்டலில் அனம் மிர்சா-அக்பர் ரஷீத் திருமண நிச்சயதார்த்தம் இன்று நடக்கிறது. நெருங்கிய உறவினர்கள், நண்பர்கள் மற்றும் பிரபலங்களுக்கு அழைப்பிதழ் கொடுக்கப்பட்டிருக்கிறது. சகோதரியின் நிச்சயதார்த்த நிகழ்ச்சி காரணமாகவே சானியா மிர்சா நியூயார்க்கில் இருந்து சீக்கிரமாகவே ஐதராபாத்துக்கு திரும்பினார் என்பது குறிப்பிடத்தக்கது.
இப்போது நிச்சயதார்த்த வேலைகளில் தீவிர கவனம் செலுத்தி வருவதாக சானியா மிர்சா நிருபர்களிடம் பூரிப்புடன் தெரிவித்தார். இந்த விழாவில் சானியா மிர்சா வைரம் பதித்த கவுன் அணிந்தும், மணமகள் அனம் மிர்சா ‘காக்ரோ சோளி’ உடையிலும் கலக்க இருக்கிறார்களாம். நிச்சயதார்த்தம் முடிந்ததும் மும்பையைச் சேர்ந்த பாடகி பூஜா கய்தோண்டே பாட உள்ளார்.
