திடீர் திருப்பம். சரத்குமார்-விஷால் அணிகள் ஒன்று சேருமா?
நாளை வெளியாக வேண்டிய பாயும் புலி’ படம் உள்பட எந்த தமிழ்ப்படமும் செப்டம்பர் 4முதல் வெளியாகாது என்றும், தயாரிப்பாளர்களை மிரட்டி வரும் ஒருசில விநியோகிஸ்தர்களுக்கு எதிராக நடவடிக்கை எடுக்கும்வரை இந்த நிலை நீடிக்கும் என தயாரிப்பாளர் சங்கம் நேற்று அறிவித்தது. ஆனால் ‘பாயும் புலி’ திரைப்படமும், ‘சவாலே சவாளி’ திரைப்படமும் திட்டமிட்டபடி நாளை வெளிவரும் என அந்தந்த படத்தின் தயாரிப்பாளர்கள் அறிவித்துள்ளனர். விஷாலும் ‘பாயும் புலி’ திட்டமிட்டபடி வெளியாகும் என்றும், ஒருசில விநியோகிஸ்தர்களுக்காக உலகம் முழுவதும் படத்தை ரிலீஸ் செய்ய தடை விதிப்பது சரியான முடிவு ஆகாது என்றும் அவர் கூறியுள்ளார்.
இந்நிலையில் விஷாலின் முடிவுக்கு நடிகர் சங்கத்தலைவர் சரத்குமார் ஆதரவு அளித்துள்ளார். விஷாலின் ‘பாயும் புலி’ ரிலீஸாக தேவையான அனைத்து ஒத்துழைப்பும் நடிகர் சங்கத்தின் சார்பில் அளிக்கப்படும் என அவர் கூறியுள்ளார்.
நடிகர் சங்க தேர்தல் விவகாரத்தில் தனக்கு எதிராக களமிறங்கியுள்ள விஷாலுக்கு சரத்குமார் ஒத்துழைப்பு கொடுக்க முன்வந்ததை திரையுலகினர் ஆச்சரியமாக பார்த்து வருகின்றனர். இதனால் நடிகர் சங்க தேர்தலில் திடீர் திருப்பம் ஏற்படுமா? என்பதை பொருத்திருந்துதான் பார்க்க வேண்டும்
