மணிரத்னம் இயக்கிய ஓகே கண்மணி’ படத்தின் ரிசல்ட் பாசிட்டிவ்வாக அமைந்துள்ளதால் அந்த படத்தின் படக்குழுவினர் உற்சாகமாக இருக்கும் நிலையில் அமெரிக்காவில் இந்த படத்திற்கு அஜீத், விஜய், சூர்யா படங்களுக்கு சமமாக வசூல் கிடைத்திருப்பதாக கூறப்படுகிறது.
ரசிகர்கள் மட்டுமின்றி கோலிவுட் பிரபலங்களும் இந்த படம் குறித்து தங்கள் கருத்துக்களை டுவிட்டர் மற்றும் ஃபேஸ்புக்கில் பதிவு செய்து வருகின்றனர். இந்நிலையில் இந்த படம் குறித்து தமது கருத்தை பிரமாண்ட இயக்குனர் ஷங்கர் தனது டுவிட்டரில் தெரிவித்துள்ளார்.
தற்போது அமெரிக்காவில் இருக்கும் ஷங்கர் இந்த படத்தை தமிழ் ரசிகர்களோடு இணைந்து பார்த்ததாகவும், அமெரிக்க ரசிகர்கள் படத்தை மிகவும் ரசித்து பார்த்ததாகவும் அவர் தெரிவித்துள்ளார்.
மணிரத்னம் அவர்களின் ஆரம்பகால படத்தை பார்த்துதான் ஷங்கர் சினிமாவுக்கு வந்ததாகவும், மணிரத்னத்தின் தீவிர ரசிகர் ஷங்கர் என்பதையும் அவர் பல பேட்டிகளில் தெரிவித்துள்ளார் என்பது குறிப்பிடத்தக்கது.
தற்போது ஷங்கர் தனது படத்தின் ஆரம்பகட்ட பணிகளை செய்து வருவதாகவும், அவருடைய அடுத்த படம் அனேகமாக எந்திரன் 2ஆக இருக்கும் என்றும் நம்பப்படுகிறது.
