நான் பிறவியிலேயே ஒரு காங்கிரஸ்காரன். முன்னாள் பாஜக எம்பி சித்து
கடந்த சில மாதங்களுக்கு முன்புவரை பாஜகவின் எம்பியாக இருந்த முன்னாள் கிரிக்கெட் வீரர் நவ்ஜோத்சிங் சித்து, நான் பிறவியிலேயே ஒரு காங்கிரஸ்காரன் என்று கூறி நேற்று ராகுல்காந்த் முன்னிலையில் காங்கிரஸ் கட்சியில் இணைந்தார். வரும் பஞ்சாப் சட்டசபை தேர்தலில் அவர் முதல்வர் வேட்பாளராக நிறுத்தப்படலாம் என்றுகூறப்படுகிறது.
காங்கிரஸ் கட்சியில் இணைந்தவுடன் செய்தியாளர்களிடம் சித்து கூறியபோது, ‘நான் பிறவியிலேயே ஒரு காங்கிரஸ்காரன். தற்போது என்னுடைய வேர் அமைப்புக்கு மீண்டும் வந்துள்ளேன். அந்த வகையில் இது என்னுடைய ‘கார்வாப்சி’. பாதல் அரசின் தவறான நிர்வாகத்தில் இருந்து பஞ்சாப்பை விடுவித்து அமைதி மற்றும் வளர்ச்சியின் பாதையில் மாநிலத்தை வழிநடத்த வேண்டும்’ என்று கூறினார்
மேலும் பஞ்சாப் மாநிலத்துக்கு முதல்-அமைச்சராகும் எண்ணம் இல்லை என்று கூறிய சித்து, காங்கிரஸ் தலைமை தேர்வு செய்யும் யாருடைய தலைமையின் கீழும் பணி செய்யவும், எந்த தொகுதியிலும் போட்டியிடவும் தயார் என்றும் கூறினார்.
பஞ்சாப்பை தனது பழைய செழுமைக்கு மீட்டெடுப்பதே தனது நோக்கம் என்று கூறிய அவர், வேறு தனிப்பட்ட செயல்திட்டம் எதுவும் தனக்கு இல்லை என்றும் தெரிவித்தார்.
