சிவாஜிக்கு மணிமண்டபம்: ஜெயலலிதாவுக்கு சிவாஜி குடும்பத்தினர் நேரில் நன்றி
நடிகர் திலகம் சிவாஜிகணேசனுக்கு தமிழக அரசே தனது சொந்த செலவில் மணிமண்டபம் அமைக்கும் என சமீபத்தில் தமிழக முதல்வர் ஜெயலலிதா சட்டமன்றத்தில் அறிவித்தார். இந்த அறிவிப்புக்கு எதிர்க்கட்சி தலைவர்கள் உள்பட பலரும் பாராட்டு தெரிவித்தனர்.
நடிகர் சங்க நிர்வாகிகள் மற்றும் கோலிவுட் திரையுலகமே முதல்வருக்கு தங்கள் நன்றியை தெரிவித்தனர். இந்நிலையில் சிவாஜி குடும்பத்தினர் அனைவரும் இன்று முதல்வரை நேரில் சந்தித்து நன்றி தெரிவித்தனர்.
இன்று காலை தலைமைச்செயலகத்தில் சிவாஜி குடும்பத்தினர் தமிழக முதல்வரை நேரில் சந்தித்தனர். முதல்வரைச் சந்தித்துப் பேசிவிட்டு சிவாஜி குடும்பத்தினர் மிகுந்த மகிழ்ச்சியுடன் வெளியில் வந்ததாக செய்திகள் வெளிவந்துள்ளது.
இந்தச்சந்திப்பில் நடிகர்பிரபு, அவருடைய அண்ணன் ராம்குமார் உட்பட பலர் கலந்துகொண்டனர், நடிகர் விக்ரம்பிரபு வெளியூர் படப்பிடிப்பில் இருப்பதால் இதில் கலந்துகொள்ளவில்லை என்று தெரிகிறது.
