தமிழ் சினிமா நட்சத்திரங்கள் மட்டுமின்று உலகில் உள்ள அனைத்து திரை நட்சத்திரங்களும் ஃபேஸ்புக், டுவிட்டர் போன்ற சமூக இணையதளத்தில் தங்களது பெயரில் தனியாக பக்கம் ஒன்றை தொடங்கி, அதில் தாங்கள் நடிக்கும் படங்கள் பற்றியும், தங்களது சொந்த வாழ்க்கை, விருப்பு, வெறுப்புகல் குறித்தும், வெளிநாடுகளில் தங்களது விடுமுறை நாட்களை ஜாலியாக கொண்டாடியது குறித்தும் பல தகவல்களை ரசிகர்களுடன் நேரடியாக பகிர்ந்து கொள்கின்றனர்.
சூப்பர் ஸ்டார் முதல் பவர் ஸ்டார் வரை டுவிட்டரை கலக்கி வரும் நிலையில், தற்போது இவர்கள் வரிசையில் நடிகர் சூர்யாவும் நேற்று முதல் டுவிட்டரில் இணைந்துள்ளார். https://twitter.com/Suriya_offl என்ற பெயரில் சூர்யாவின் அதிகாரபூர்வமான டுவிட்டர் கணக்கு தொடங்கப்பட்டுள்ளது.
இந்த டுவிட்டர் கணக்கை சூர்யா தொடங்கி சில நிமிடங்களில் 13 ஆயிரத்துக்கும் மேற்பட்டோர் அவரது டுவிட்டரை தொடர ஆரம்பித்துள்ளனர் என்பது குறிப்பிடத்தக்கது. இந்த எண்ணிக்கை இன்னும் அதிகரிக்கும் என எதிர்பார்க்கப்படுகிறது.
இந்த டுவிட்டர் பக்கத்தில் சூர்யா பேசிய செல்பி வீடியோ ஒன்று வெளியாகியுள்ளது. அதில் அவர் பேசும்போது, அனைவருக்கும் மகளிர் தின வாழ்த்துக்கள். ரொம்ப நாளாக டுவிட்டருக்கு வரவேண்டும் என எண்ணி இருந்தேன். இன்று வந்தாச்சு. ஏன்? எதுக்குன்னு, கேள்வியெல்லாம் கேட்டீங்கன்னா, என்னால நினைக்க முடிந்ததைவிட அதிகமாக அன்பு காட்டுகிறீர்கள். அதுக்காகத்தான். உங்களுடைய அன்புக்கும், ஆதரவுக்கும் நன்றி என்று பேசியுள்ளார்.
டுவிட்டரில் சூர்யா இணைந்ததை அடுத்து அவரது டுவிட்டர் ரசிகர்கள் வெல்கம் சூர்யா டு டுவிட்டர் (#WelcomeSuriyaToTwitter) என்ற புதிய ஹேஷ்டேக்கை ஏற்படுத்தி, இந்திய அளவில் டுவிட்டர் டிரெண்ட்டை அவரது ரசிகர்கள் பிரபலமாக்கி வருகின்றனர்.
