ஆஸ்திரேலியாவுக்கு எதிரான 3வது ஒருநாள் போட்டி. இங்கிலாந்து அணி அபார வெற்றி
இங்கிலாந்து மற்றும் ஆஸ்திரேலியா அணிகளுக்கு இடையிலான ஐந்து ஒருநாள் போட்டிகளில் முதல் இரண்டு போட்டிகளில் ஆஸ்திரேலியா அபாரமாக வெற்றி பெற்றுள்ள நிலையில் இன்று மூன்றாவது ஒருநாள் கிரிக்கெட் போட்டி மான்செஸ்டர் நகரில் நடைபெற்றது.
இந்த போட்டியில் டாஸ் வென்ற இங்கிலாந்து அணி முதலில் பேட்டிங் செய்ய தீர்மானித்தது. நிர்ணயிக்கப்பட்ட 50 ஓவர்களில் இங்கிலாந்து அணி 8 விக்கெட்டுக்கள் இழப்பிற்கு 300 ரன்களை குவித்தது. டெய்லர் 101 ரன்களும், ராய் 63 ரன்களும், மோர்கன் 62 ரன்களும் எடுத்தனர். ஆஸ்திரேலிய தரப்பில் மாக்ஸ்வெல் மற்றும் கம்மின்ஸ் தலா இரண்டு விக்கெட்டுக்களை கைப்பற்றினர்.
இதனையடுத்து 301 ரன்கள் எடுத்தால் வெற்றி என்ற கடின இலக்கை நோக்கி ஆஸ்திரேலியா களமிறங்கியது. ஆனால் அந்த அணி 44 ஓவர்களில் அனைத்து விக்கெட்டுக்களையும் இழந்து 207 ரன்களை மட்டுமே எடுத்து படுதோல்வி அடைந்தது. ஃபின்ஸ் 53 ரன்களும், வாடே 42 ரன்களும் எடுத்தனர். மற்ற வீரர்கள் சொற்ப ரன்களுக்கு ஆட்டமிழந்தனர். இந்த வெற்றியின் மூலம் இங்கிலாந்து அணி தனது முதல் வெற்றியை பதிவு செய்தது. டெய்லர் ஆட்டநாயகனாக தேர்வு செய்யப்பட்டார். இரு அணிகளுக்கு இடையிலான 4வது ஒருநாள் போட்டி வரும் 11ஆம் தேதி நடைபெறும்.
