வைரவிழாவா? வயதானவர்கள் விழாவா?பொன்.ராதாகிருஷ்ணன் கேள்விக்கு மு.க.ஸ்டாலின் பதில்
திமுக தலைவர் கருணாநிதியின் 94வது பிறந்த நாள் மற்றும் 60 ஆண்டுகாலம் சட்டமன்றத்தில் பணி செய்த ‘வைரவிழா’ நேற்று முன் தினம் சென்னையில் நடைபெற்றது. இந்த விழாவில் அகில இந்திய காங்கிரஸ் துணைத்தலைவர் ராகுல்காந்தி, பீகார் முதல்வர் நிதிஷ்குமார், புதுவை முதல்வர் நாராயணசாமி உள்பட பலர் கலந்து கொண்டனர்.
இந்த நிலையில் இந்த விழா குறித்து கருத்து கூறிய மத்திய அமைச்சர் பொன்.ராதாகிருஷ்ணன், ‘சென்னையில் நடந்தது கருணாநிதி வைரவிழா அல்ல. வயதானோருக்கான விழா. அரசியலில் ஓரங்கட்டப்பட்டவர்களை கொண்டு நடத்தப்பட்ட விழா. மக்களால் புறக்கணிக்கப்பட்டு தோற்றுபோன விழா. தமிழகத்தை மீண்டும் 50 ஆண்டுகள் இருளில் தள்ள திராவிட கட்சிகள் முயற்சி செய்கின்றன’ என்று கூறினார்.
பொன்.ராதாகிருஷ்ணனின் இந்த கருத்துக்கு இன்று பதிலளித்த திமுக செயல்தலைவர் மு.க.ஸ்டாலின், ‘வைரவிழா வயதானோருக்கான விழா என கூறிய பொன்.ராதா 16 வயது இளைஞரா? என்று கேள்வி எழுப்பியுள்ளார். மேலும் மிருக பலத்துடன் ஆட்சியில் இருக்கும் பாஜக அரசு தமிழை ஆட்சி மொழியாக்க முயற்சி செய்யாமல், இந்தியை திணிக்க முயற்சி செய்வதாகவும் ஸ்டாலின் கூறினார்.
