டான்சில் எனப்படும் நிணநீர்த்தசை பிறக்கும் போதே குழந்தைகளுக்கு இருக்கும். தொண்டையில் கிருமிகள் எதுவும் நுழையாதபடி பாதுகாப்பதே இதன் முக்கிய பணியாகும். இதில் ஏற்படும் பாக்டீரியா கிருமிகளின் தொற்றினால் சளி பிடிக்கும்.
சில குழந்தைகளுக்கு டான்சில் பிரச்சனையால் தொண்டையில் உள்ள நிணநீர் கட்டிகள் பெரிதாகி வலியும் காய்ச்சலும் ஏற்படும். டான்சில் தசையில் சீழ் கட்டி இருக்கும். தொற்றுக்கிருமிகளால் அதிகம் பாதிக்கப்பட்டு இருக்கும். இதற்கு ‘அக்யூட் டான்சிலிட்டிஸ்’ என்று பெயர். சிலருக்கு மூக்குக்கு பின்னால் உள்ள அடினாயிட் நிணநீர் நாளங்கள் பெரிதாகி அடைத்துக்கொள்வதால் கூட டான்சில் பிரச்சனை ஏற்படும்.
இவர்களுக்கு மூச்சு விடுவதில் சிரமம் ஏற்படும். மூக்கின் பின் பக்கத்தையும் நடுக் காதையும் இணைக்கும் ஈஸ்டேசி யன் ட்யூப் பகுதியில் உள்ள டான்சில் நிணநீர் நாளங்கள் பெரிதாகி அடைத்துக்கொள்ளும். காதுகளில் திரவம் சேர்ந்து வலி எடுக்கும். இதனால் குழந்தைகளின் கேட்கும் திறன் பாதிப்படையும். சிறிய அறுவை சிகிச்சை ஒன்றை செய்வதன் மூலம் இந்தப் பிரச்சனையை எளிதாக சரிசெய்யலாம்.
சில பெற்றோர் ‘அடிக்கடி குழந்தைகளுக்கு சளி பிடிக்கிறது. அதனால் டான்சில் ஆபரேஷன் செய்தால் சரியாகும்’ என்று நினைக்கிறார்கள். இது தவறான எண்ணம். ‘ஐஸ்க்ரீம், குளிர் பானங்கள் சாப்பிடுவதால் குழந்தைகளுக்கு டான்சில் பிரச்சனை ஏற்படும்’ என்பதும் தவறான நம்பிக்கை. தேவைப்பட்டால் மட்டுமே அறுவை சிகிச்சை செய்ய வேண்டும்.
மற்றபடி மருந்து, மாத்திரைகள் மூலம் குணப்படுத்தி விடலாம். டான்சில் பிரச்சனை பெரும்பாலும் பாக்டீரியா கிருமிகளால்தான் ஏற்படுகிறது. அதனால் வீட்டிலும் பள்ளியிலும் குழந்தைகள் சுத்தமாக இருக்க கற்றுக் கொடுத்தாலே பிரச்சனை தலை தூக்காது.’’
