காஷ்மீரில் விடிய விடிய துப்பாக்கி சண்டை. 2 இந்திய பாதுகாப்பு படை வீரர்கள் பலி
காஷ்மீரில் தீவிரவாதிகளுக்கும் பாதுகாப்பு படையினர்களுக்கு நேற்று இரவில் இருந்து அதிகாலை வரை விடிய விடிய துப்பாக்கி சண்டை நடைபெற்றதாகவும், இந்த சண்டையில் இரண்டு பாதுகாப்பு படை வீரர்கள் உயிரிழந்ததாகவும் தகவல்கள் வெளிவந்துள்ளது.
ஜம்மு-காஷ்மீர் மாநிலத்தில் உள்ள குப்வாரா என்ற மாவட்டத்தில் ஹண்ட்வாரா என்ற பகுதி அருகில் தீவிரவாதிகளின் நடமாட்டம் இருப்பதாக வந்த ரகசிய தகவலை அடுத்து அந்த பகுதிக்கு நேற்று பாதுகாப்பு படையினர்களின் ஒரு பிரிவு சென்று தீவிரவாதிகளை சுற்றி வளைத்தது. இதனால் அதிர்ச்சி அடைந்த தீவிரவாதிகள் பாதுகாப்பு படையினர்களை நோக்கி சுட்டனர்.
பதிலுக்கு பாதுகாப்புப் படை வீரர்களும் துப்பாக்கிகளால் சுட்டு தாக்குதல் நடத்தினர். இந்த துப்பாக்கி சண்டை இன்று அதிகாலை வரை நீடித்ததால் பெரும் பரபரப்பு ஏற்பட்டது. இந்த துப்பாக்கிச் சண்டையில் பாதுகாப்புப் படையைச் சேர்ந்த இரண்டு வீரர்கள் பரிதாபமாக உயிரிழந்ததாகவும் தீவிரவாதிகள் தரப்பில் எத்தனை பேர் உயிரிழந்துள்ளார் என்பது குறித்த தகவல் இன்னும் வெளிவரவில்லை என்றும் கூறப்படுகிறது.
இதனையடுத்து இன்று அதிகாலை அந்த பகுதிக்கு கூடுதலாக பாதுகாப்பு படைகள் அனுப்பி வைக்கப்பட்டுள்ளதாகவும் தொடர்ந்து அந்த பகுதியில் துப்பாக்கி சண்டை நடைபெற்று வருவதாகவும் பாதுகாப்புப் படை வட்டாரங்கள் தெரிவித்துள்ளது.
Chennai Today News: Two militants killed in encounter at Jammu and Kashmir’s Handwara
