திருச்சி ரவுடிக்கும்பல் கட்டுப்பாட்டில் மதன்? அதிர்ச்சி தகவல்
கடந்த இரண்டு மாதங்களுக்கு முன்னர் காணாமல போன வேந்தர் மூவீஸ் மதன் இருப்பிடம் குறித்து இதுவரை எந்த வித தகவலும் உறுதியாக தெரியவில்லை. அவர் நேபாளத்தில் அல்லது காசியில் இருக்கலாம் என அனைத்து தகவல்களும் கூறிய நிலையில் அவர் தமிழ்நாட்டில் அதுவும் திருச்சியில்தான் இருப்பதாகவும், அவரை திருச்சியை சேர்ந்த ரவுடி கும்பல் தங்கள் கட்டுப்பாட்டில் வைத்திருப்பதாகவும் கூறப்படுகிறது.
இதுகுறித்து போலீஸ் அதிகாரிகள் சிலர் கூறியபோது, “சமீபத்தில் மதன், அவரது உறவினர் ஒருவரிடம் போனில் பேசியிருக்கிறார். இதன்மூலம் அவர் பதுங்கி இருக்கும் இடம் எங்களுக்குத் தெரியவந்தது. திருச்சியைச் சேர்ந்த ஒரு ரவுடி கும்பலின் கட்டுப்பாட்டில் மதன் இருப்பதாகவும் எங்களுக்குத் தகவல் கிடைத்துள்ளது. அந்தக் கும்பல், மதன் மூலம் நடந்த பணபரிவர்த்தனை தொடர்பாக விசாரித்து சிலருக்கு தகவல் தெரிவித்த விவரமும் தெரியவந்துள்ளது. அடுத்த விசாரணைக்குள் மதனை நீதிமன்றத்தில் ஆஜர்படுத்துவதற்கான பணிகள் முழுவீச்சில் நடந்து வருகின்றன. இப்போதுள்ள சூழ்நிலையில் மதன், விமானம் மூலம் வெளிநாடுகளுக்கு தப்பிச் செல்வதற்கான வாய்ப்புகள் குறைவு. இதனால் அவரைத் தேடப்படும் குற்றவாளியாக அறிவிப்பதைத் தற்காலிகமாக நிறுத்தி வைத்துள்ளோம்” என்று கூறினர்.
திருச்சி சேர்ந்த ரவுடிக்கும்பலிடம்தான் மதன் இருப்பது உண்மையானால் மதனை பிடிப்பது போலீசாருக்கு பெரிய விஷயமில்லை ஆனாலும் போலீசார் தாமதம் செய்வது ஏன் என்பது தெரியவில்லை என்றும் கூறப்படுகிறது.
இந்நிலையில் மதனை நீதிமன்றத்தில் வரும் 17ஆம் தேதி ஆஜர்படுத்த வேண்டும் என்ற உத்தரவு உள்ளது என்பதும் குறிப்பிடத்தக்கது.
