தளபதியிடம் பேசினாரா இளையதளபதி. பரபரப்பு தகவல்
தமிழக சட்டமன்ற தேர்தல் வரும் 16ஆம் தேதி நடைபெறவுள்ள நிலையில் கோலிவுட் திரையுலகை சேர்ந்த பலர் பல்வேறு அரசியல் கட்சிகளுக்காக பிரச்சாரம் செய்து வருகின்றனர். ஆனால் பெரிய நடிகர்கள் யாரும் எந்த அரசியல் கட்சிக்கும் ஆதரவு தெரிவிக்காமல் ஒதுங்கியிருக்கும் நிலையில் விஜய், தனது ரசிகர்களை திமுகவுக்கு பிரச்சாரம் செய்ய சொன்னதாக தகவல்கள் வெளிவந்துள்ளது.
விஜய் ரசிகர் மன்ற மாநிலத் தலைவர் ஆனந்த், அனைத்து மாவட்ட விஜய் ரசிகர் மன்ற தலைவர்களுக்கு திமுகவுக்கு ஆதரவாக பிரச்சாரம் செய்ய சொன்னதாகவும், இதனையொட்டி கோவைக்கு தேர்தல் பிரச்சாரம் செய்ய வந்த மு.க.ஸ்டாலினை விஜய் ரசிகர் மன்ற நிர்வாகிகள் சந்தித்து தங்கள் ஆதரவை தெரிவித்ததாகவும் கூறப்படுகிறது.
வெளிப்படையாக ஆதரவு தெரிவித்தால் மீண்டும் அதிமுக ஆட்சி வந்தால் சிக்கல் என்பதால் ஆதரவை ரகசியமாக வைத்திருப்பதாகவும், இதுகுறித்து தேர்தல் முடிந்தவுடன் விஜய்யே பிரஸ்மீட் ஒன்றில் தெரிவிப்பார் என்றும் கூறப்படுகிறது.
திமுகவுக்கு ஆதரவாக பிரச்சாரம் செய்யுங்கள் என்று கூறும் விஜய் ரசிகர் மன்ற மாநிலத் தலைவர் ஆனந்த், புதுச்சேரியில் திமுகவை எதிர்த்து என்.ஆர்.காங்கிரஸ் வேட்பாளராக போட்டியிடுகிறார் என்பது குறிப்பிடத்தக்கது.
