எம்.ஜி.ஆர்-சிவாஜி ஆத்மா எங்கள் பக்கம். விஷால்
தென்னிந்திய நடிகர் சங்க தேர்தலுக்கு இன்னும் ஐந்து நாட்களே உள்ள நிலையில் சரத்குமார் மற்றும் விஷால் அணியினர் உச்சகட்ட பிரச்சாரத்தில் ஈடுபட்டு வருகின்றனர். இந்நிலையில் மறைந்த இலட்சிய நடிகர் எஸ்.எஸ்.ஆர் அவர்களின் முதலாம் நினைவேந்தல் நிகழ்ச்சி நேற்று சென்னை காமராஜர் அரங்கத்தில் நடைபெற்றது. அவ்விழாவில் நடிகர் விஷால் கலந்துகொண்டு நெகிழ்ச்சியாக பேசினார்.
இந்நிகழ்ச்சியில் விஷால் பேசியபோது, “ எனக்கு இன்று மிகுந்த காய்ச்சல், பேசிப் பேசியே காய்ச்சல் வந்துவிட்டது இருக்கட்டும் இன்னும் 5 நாட்கள் தான் தேர்தலுக்கு உள்ளது. எனக்கு மேடையில் பேச வாய்ப்பளித்த எஸ்.எஸ்.ஆர் அவர்களின் குடும்பத்தினருக்கு நன்றி.
இதைப் போன்ற மேடையில் எனக்கு பேச வாய்ப்புக் கிடைத்தது மிகப்பெரிய விஷயம்.இங்கே விஜயகுமாரி அம்மாவின் அருகே அமர்ந்து பேச எனக்கு வாய்ப்புக் கிடைத்திருக்கிறது. யாருக்கும் கிடைக்காத அரிய வாய்ப்பு இது. எனக்கு அவர்கள் அருகே அமர்ந்திருப்பது இன்னும் மகிழ்ச்சி , ஏன் என்றால் என்னுடைய தந்தை விஜயகுமாரி அம்மாவின் மிகப்பெரிய ரசிகர்.
இப்போது தொலைக்காட்சியில் இந்த நிகழ்ச்சியைப் பார்த்துக் கொண்டு இருப்பார் என்று நான் நினைக்கிறேன். வாரா வாரம் வெள்ளிக்கிழமை ஒரு புதுப்பையன் ஒரு புதுப்பொண்ணு என்று வரிசை கட்டி வந்து கொண்டு இருக்கும் இந்த வேளையில் என்னுடைய ஆசை எல்லாம், பழம்பெரும் நடிகர், நடிகைகள் மற்றும் சாதனையாளர்களை எல்லா நிகழ்ச்சிக்கும் அழைக்க வேண்டும் என்பது தான்.
இதை நான் தேர்தல் சமயத்தில் கூறுவதால் எல்லோரும் தவறாக நினைக்க வாய்ப்பு உண்டு. ஆனால் இதை நான் மனதில் இருந்து பேசுகிறேன். நமக்கெல்லாம் அவர்கள் தான் வழிகாட்டிகள்.
எஸ்.எஸ்.ஆர் ,எம்.ஜி.ஆர் ,சிவாஜி ஆகியோரின் ஆத்மா எங்களுக்குள் இப்போது இறங்கி நடிகர் சங்க கட்டிடத்தைக் கட்ட எங்களைத் தயாராக்கி வருகிறது’ இவ்வாறு என்று பேசினார்.
