பக்குவ மனதுடன் செயல்படும், மேஷ ராசி அன்பர்களே!
குரு, சுக்கிரன், புதன், ராகு நற்பலன் தருவர். மனதில் மகிழ்ச்சி நிறைந்திருக்கும். திட்டமிட்டபடி, புதிய முயற்சியில் ஈடுபடுவீர்கள். உறவினர்களிடம் இருந்த கருத்து வேறுபாடு மறையும். வீடு, வாகனத்தில் பராமரிப்புச் செலவு ஏற்படும். புத்திரர்களின் செயல்பாடு கண்டு பெருமை கொள்வீர்கள். மனைவியின் விருப்பம் அறிந்து நிறைவேற்றுவீர்கள். தொழில், வியாபாரத்தில் வருமானம் படிப்படியாக உயரும். பணியாளர்கள் எதிர்பார்த்த சலுகை கிடைக்கப் பெறுவர். பெண்கள் மனம் போல ஆடை, ஆபரணம் வாங்குவர். மாணவர்கள் படிப்பில் மட்டும் கவனம் செலுத்துவது நல்லது.
சந்திராஷ்டமம்: 23.8.15 காலை 6:00 மணி முதல் 24.8.15 இரவு 8:09 மணி வரை
பரிகாரம்: முருகன் வழிபாடு, செயலில் வெற்றியளிக்கும்.
லட்சியத்தில் உறுதி மிக்க, ரிஷப ராசி அன்பர்களே!
செவ்வாய், சுக்கிரன், சனி, கேது ஆகியோர் நன்மை தருவர். தடை நீங்கி முன்னேற்றம் வாழ்வில் உருவாகும். கடந்தகால உழைப்பின் பயனைத் தற்போது அனுபவிப்பீர்கள். குடும்பத்தினர் விருப்பம் அறிந்து நிறைவேற்றுவீர்கள். நண்பர்களுடன் சுற்றுலா செல்ல வாய்ப்புண்டு. புத்திரருடன் கருத்து பேதம் ஏற்படலாம் கவனம். மனைவியின் ஆலோசனையை ஏற்பது முன்னேற்றத்திற்கு வழிவகுக்கும். தொழில், வியாபாரத்தில் நல்ல லாபம் கிடைக்கும். பணியாளர்கள் சுறுசுறுப்பாகச் செயல்பட்டு பணி இலக்கை எட்டிப் பிடிப்பர். பெண்கள், தாய்வீட்டினரின் அன்பைப் பெறுவர். மாணவர்கள் ஆர்வமுடன் படித்து முன்னேறுவர்.
சந்திராஷ்டமம்: 24.8.15 இரவு 8:10 மணி முதல் 26.8.15 இரவு 1:42 மணி வரை
பரிகாரம்: லட்சுமி வழிபாட்டால், நன்மை ஏற்படும்.
அன்புடன் பேசிப் பழகும், மிதுன ராசி அன்பர்களே!
சூரியன், சுக்கிரன், புதனால் நற்பலன் உண்டாகும். நீண்டநாள் எதிர்பார்ப்பும் கூட, அதிர்ஷ்டவசமாக நிறைவேறும். தாய்வழி உறவினர்களின் உதவி கிடைக்கும். புத்திரர், உங்கள் சொல்லுக்கு கட்டுப்பட்டு நடப்பர். மறைமுக எதிரிகள் இருந்த இடம் தெரியாமல் விலகிச் செல்வர். மனைவியின் அன்பைக் கண்டு மனம் மகிழ்வீர்கள். தொழில், வியாபாரத்தில் நிர்வாகச் சீர்திருத்தத்தில் ஈடுபடுவீர்கள். பணியாளர்களுக்கு விண்ணப்பித்த கடனுதவி கிடைக்கும். பெண்களுக்கு சமூகத்தில் மரியாதை கூடும். மாணவர்கள் பெற்றோரின் மனம் மகிழும் விதத்தில் படிப்பர்.
சந்திராஷ்டமம்: 26.8.15 இரவு 1:43 மணி முதல் 29.8.15 அதிகாலை 5:23 மணி வரை
பரிகாரம்: விநாயகர் வழிபாடு, குடும்பத்தில் மகிழ்ச்சி தரும்.
திறமையுடன் செயல்படும் கடக ராசி அன்பர்களே!
குரு, சுக்கிரன், ராகு ஆகியோரால் நன்மை கிடைக்கும். அனைவரிடமும் இனிமையுடன் பேசி மகிழ்வீர்கள். புதிய நண்பர்களின் அறிமுகம் கிடைக்கும். வீடு, வாகனத்தில் உரிய பாதுகாப்பு நடைமுறையைப் பின்பற்றுவது நல்லது. தாயின் விருப்பம் அறிந்து நிறைவேற்றுவீர்கள். நல்லவர்களின் அன்பும், ஆசியும் கிடைக்கும். புத்திரரின் செயல்பாட்டை தக்க அறிவுரை கூறி நல்வழிப்படுத்துவீர்கள். ஒவ்வாத உணவுகளை தவிர்ப்பது நல்லது. மனைவியின் கருத்துக்கு மதிப்பு அளிப்பீர்கள். தொழில், வியாபாரத்தில் மிதமான லாபம் கிடைக்கும். பணியாளர்கள் பணிச்சுமைக்கு ஆளாக நேரிடும். பெண்கள் ஆடம்பரத்தில் நாட்டம் கொள்வர். மாணவர்கள், ஆசிரியர்களின் மத்தியில் நற்பெயர் காண்பர்.
சந்திராஷ்டமம்: 29.8.15 அதிகாலை 5:24 மணி முதல் இரவு 12:00 மணி வரை
பரிகாரம்: ஆஞ்சநேயர் வழிபாட்டால், கஷ்டம் தீரும்.
நற்செயல் மூலம் புகழ் பெறும், சிம்ம ராசி அன்பர்களே!
சுக்கிரன், சனி இருவராலும் நன்மை அதிகரிக்கும். அன்பால் அனைவரையும் கவர்வீர்கள். வாழ்வில் முன்னேற்றத்திற்காக புதிய முயற்சியில் ஈடுபடுவீர்கள். தான, தர்மத்தில் மனம் ஈடுபடும். வெளியூர் பயணம் பயனறிந்து மேற்கொள்வது நல்லது. புத்திரர்களின் செயல்பாடு கண்டு மனம் மகிழ்வீர்கள். மறைமுக எதிரிகளின் தொல்லை மறையும். மனைவி விரும்பிய பொருட்களை வாங்கித் தருவீர்கள். தொழில், வியாபாரத்தில் எதிர்பார்த்ததை விட லாபம் அதிகரிக்கும். பணியாளர்கள் பணிச்சுமையில் இருந்து விடுபடுவர். பெண்கள் பிள்ளைகளின் நலனில் அக்கறை கொள்வர். மாணவர்கள் ஆர்வமுடன் படித்து சிறப்பர்.
பரிகாரம்: சிவன் வழிபாடு, முன்னேற்ற வாழ்வு தரும்.
குடும்பத்தினர் மீது பாசம் மிக்க, கன்னி ராசி அன்பர்களே!
செவ்வாய், சுக்கிரன், சந்திரன் மட்டுமே நற்பலன் தருவார். உறவினர்களிடம் கருத்து வேறுபாடு மறைந்து நிம்மதி பிறக்கும். குடும்பத்தில், சுப விஷயம் குறித்த பேச்சு அடிக்கடி நடந்தேறும். வாகனத்தில் மிதவேகத்தைக் கடைபிடிப்பது நல்லது. புத்திரரின் வளர்ச்சிக்குத் துணைபுரிவீர்கள். அலைச்சலால் சோர்வுக்கு ஆளாக நேரிடும். மனைவியின் செயலைக் குறை சொல்வதைத் தவிர்க்கவும். தொழில், வியாபாரத்தில் சுமாரான லாபம் கிடைக்கும். பணியாளர் விண்ணப்பித்த கடனுதவி பெறுவதில் தாமதம் உண்டாகும். பெண்கள் உறவினர்களுடன் சுற்றுலா செல்வர். மாணவர்கள் படிப்பில் சாதனை படைக்க முயல்வர்.
பரிகாரம்: பைரவர் வழிபாடு, தொழிலில் வளர்ச்சி அளிக்கும்.
நேர்மை வழியில் செயல்படும், துலாம் ராசி அன்பர்களே!
குரு, சூரியன், சுக்கிரன், கேது அளப்பரிய நற்பலன் தருவர். எண்ணிய எண்ணம் எளிதில் நிறைவேறும். பணவரவும், புகழும் வந்து சேரும். இஷ்டதெய்வ அருள் பலம் துணை நிற்கும். அரசு சார்ந்த நன்மை பெறுவீர்கள். புத்திரரின் எதிர்கால நலனுக்காக முயற்சியில் ஈடுபடுவீர்கள். உடல்நிலை ஆரோக்கியமாக இருக்கும். மனைவி வழி உறவினர்களுடன் நெருக்கம் உண்டாகும். தொழில், வியாபாரத்தில் நல்ல வளர்ச்சியும், ஆதாயமும் உண்டாகும். பணியாளர்கள், பணி விஷயமாக அடிக்கடி வெளியூர் செல்ல நேரிடும். பெண்கள் அடிக்கடி விருந்து, விழாவில் பங்கேற்று மகிழ்வர். மாணவர்கள் படிப்பில் சிறந்து விளங்குவர்.
பரிகாரம்: மாரியம்மன் வழிபாடு, சுப பலன் அளிக்கும்.
துணிவுடன் செயலாற்றும், விருச்சிக ராசி அன்பர்களே!
சூரியன், புதன், ராகு மூவராலும் நன்மை மேலோங்கும். சிறு முயற்சியிலும் கூட நன்மை காண்பீர்கள். சுப விஷயத்தில் நல்ல முடிவை எட்டுவீர்கள். குடும்ப செலவுக்கான பணத்தேவை அதிகரிக்கும். மற்றவர் குடும்ப விஷயத்தில் கருத்து சொல்ல வேண்டாம். வீடு, வாகன பாதுகாப்பில் கவனம் தேவை. புத்திரர்கள், உங்களின் சொல்லுக்கு மதிப்பு கொடுப்பர். எதிரிகள் பலமிழந்து போவர். மனைவியின் கவனக்குறைவால் சிரமத்திற்கு ஆளாக நேரிடும். தொழில், வியாபாரத்தில் மூலதனத்தை அதிகப்படுத்துவீர்கள். பணியாளர்கள் நிர்வாகத்தினரின் நன்மதிப்பை பெறுவர். பெண்கள் குடும்ப நலனில் அக்கறை கொள்வர். மாணவர்கள் போட்டிகளில் பங்கேற்று வெற்றி காண்பர்.
பரிகாரம்: அய்யப்பன் வழிபாடு நிம்மதி தரும்.
அன்புடன் பழகி மகிழும், தனுசு ராசி அன்பர்களே!
குரு, சுக்கிரன், புதன், சனி ஆகியோரால் நன்மை காண்பீர்கள். குடும்பத்தில் விரைவில், சுப நிகழ்ச்சி நடத்தும் சூழல் உருவாகும். பூர்வீகச் சொத்து மூலம், எதிர்பார்த்த பணவரவு கிடைக்கும். உடன்பிறந்தவர்களின் உதவி கிடைக்கும். வாகன பயணத்தின் மூலம், இனிய அனுபவம் காண்பீர்கள். புத்திரரின் விருப்பம் அறிந்து நிறைவேற்றுவீர்கள். விருந்து, விழாவில் அடிக்கடி கலந்து கொள்வீர்கள். மனைவி வழி உறவினர்களுடன் இணக்கம் அதிகரிக்கும். தொழில், வியாபாரத்தில் படிப்படியாக லாபம் உயரும். பணியாளர்களுக்கு எதிர்பார்த்த சலுகை கிடைக்கும். பெண்கள் நிம்மதியான வாழ்வு நடத்துவர். மாணவர்கள் கல்வியில் மேம்படுவர்.
பரிகாரம்: ராமரை வழிபட்டால், நன்மை உண்டாகும்.
சமயோசித புத்தி படைத்த, மகர ராசி அன்பர்களே!
சுக்கிரன், கேதுவினால் நற்பலன் கிடைக்கும். வாக்கு ஸ்தானம் மற்றும் அதன் அதிபதி சனி பகவானை, செவ்வாய் பார்ப்பதால், நிதானமுடன் செயல்படுவது நல்லது. கடந்த கால நற்செயலுக்கு, உரிய பலன் தேடி வரும். வாகனப் போக்குவரத்தில் மிதவேகம் கடைபிடிப்பது நல்லது. புத்திரர் படிப்பு, வேலையில் நல்ல முன்னேற்றம் காண்பர். எதிர்ப்பாளரின் கெடு செயல் பலமிழக்கும். மனைவியின் ஆலோசனை வளர்ச்சிக்கு துணைநிற்கும். தொழிலில் எதிர்பார்த்த ஆதாயம் கிடைக்கும். பணியாளர்களுக்கு சம்பள உயர்வு கிடைக்கும். பெண்கள் குழந்தைகளின் வளர்ச்சி கண்டு மகிழ்வர். மாணவர்கள் சாகச விளையாட்டில் ஈடுபட வேண்டாம்.
பரிகாரம்: கிருஷ்ணரை வழிபடுவதால், மன உற்சாகம் பிறக்கும்.
உதவி மனப்பான்மை கொண்ட, கும்ப ராசி அன்பர்களே!
செவ்வாய், குரு, புதன் மூவராலும் தாராள நன்மை கிடைக்கும். பணிகளில் நேர்த்தி மிகுந்திருக்கும். புதியவர்களின் அறிமுகத்தால் நன்மை காண்பீர்கள். வீட்டுத்தேவைகளை ஆடம்பர முறையில் நிறைவேற்றுவீர்கள். புத்திரர்களின் செயல்பாடு கண்டு பெருமிதம் கொள்வீர்கள். ஆரோக்கியம் பலம் பெறும். மனைவியின் கருத்துக்கு மதிப்பளிப்பீர்கள். தொழில், வியாபாரத்தில் போட்டி குறைவதால், லாபம் அதிகரிக்கும். பணியாளர்கள் புதிய தொழில் நுட்பங்களை ஆர்வமுடன் கற்பர். பெண்கள் குடும்ப நலனுக்காகப் பாடுபடுவர். மாணவர்கள் திட்டமிட்டுப் படித்து முன்னேறுவர்.
பரிகாரம்: காமதேனு வழிபாட்டால், செல்வ வளம் கூடும்.
வாக்குறுதியை நிறைவேற்றும், மீன ராசி அன்பர்களே!
சூரியன், சந்திரன் இருவராலும் நற்பலன் பெறுவீர்கள். ஆர்வமுடன் புதிய முயற்சிகளில் ஈடுபடுவீர்கள். உடன் பிறந்தவர்களுக்கு உதவி செய்வீர்கள். உடல்நலனுக்காக மருத்துவ சிகிச்சை தேவைப்படலாம். குடும்பச் செலவுக்காக கடன் வாங்க நேரிடும். வெளியூர் பயணம் பயன் அறிந்து மேற்கொள்வது நல்லது. மனைவியின் செயல்பாடு நிம்மதிக்கு வழிவகுக்கும். தொழில், வியாபாரத்தில் மிதமான லாபம் கிடைக்கும். பணியாளர் பணிச்சுமைக்கு ஆளாவர். பெண்கள் அடுத்தவர் குடும்ப விஷயத்தில் தலையிடுவதை தவிர்க்கவும். மாணவர்கள் படிக்கும் நேரத்தை அதிகப்படுத்துவர்.
பரிகாரம்: சனீஸ்வரர் வழிபாடு, துன்பம் போக்கும்.
